“திமுகவுக்கு ஷாக்… தவெக-வுக்கு சப்போர்ட்…! நாங்க இருக்கோம்…! விஜய் தலைமையில் கூட்டணி… அந்தர் பல்டி அடித்த திருமாவளவன்…! அதிரடி திருப்பம்…!”

திருவாரூரில் செய்தியாளர்களைச் சந்தித்த விடுதலைச் சிறுத்தைகள் கட்சியின் தலைவர் தொல். திருமாவளவன், தவெக அரசு ஐந்து ஆண்டுகள் முழுமையாக நீடிக்கும் என்றும், இந்த ஆட்சி கவிழ்வதற்கு எந்தவித முகாந்திரமும் இல்லை என்றும் திட்டவட்டமாகத் தெரிவித்துள்ளார். தவெக அரசு ஆறு மாதத்தில் கவிழ்ந்துவிடும் என திமுக தலைவர்கள் கூறி வரும் நிலையில், தற்போதைய ஆட்சி மக்களின் கட்டளையால் உருவானது என அவர் குறிப்பிட்டுள்ளார். மேலும், தவெக ஆட்சியில் தாங்கள் பங்கு பெற்றுள்ளதாகவும், இதற்கான கூட்டணிக் பேச்சுவார்த்தைகள் நடந்து வருவதாகவும் கூறிய அவர், விரைவில் தவெக தலைமையில் புதிய கூட்டணி அமையும் என்றும் அறிவித்துள்ளார்.

பல்வேறு சமூக மற்றும் அரசியல் விவகாரங்கள் குறித்துப் பேசிய திருமாவளவன், சபரிவர்மன் கொலை வழக்கை சிபிஐ விசாரணைக்கு மாற்ற வேண்டும் எனத் தமிழக அரசுக்கு வேண்டுகோள் விடுத்தார். அத்துடன், காவிரி நீர் பிரச்சனை மற்றும் மேகதாது அணை விவகாரம் தொடர்பாகத் தமிழ்நாடு முதலமைச்சர் உடனடியாக அனைத்துக் கட்சிக் கூட்டத்தைக் கூட்ட வேண்டும் என்றும், பல்கலைக்கழகத் துணைவேந்தர்கள் நியமனத்தில் முதலமைச்சரே வேந்தராக இருக்கும் சட்ட நடைமுறையைத் தற்போதைய அரசு உறுதியாகப் பின்பற்ற வேண்டும் என்றும் வலியுறுத்தினார். மேலும், நேரடியாக இந்தியைத் திணிக்கும் நவோதயா பள்ளிகளைத் திறக்கக் கூடாது என்ற முந்தைய அரசின் நிலைப்பாட்டிலேயே புதிய தவெக அரசும் தொடரும் என நம்புவதாக அவர் தெரிவித்தார்.

மதுரை மற்றும் சேலத்தில் தனது போஸ்டர்கள் சேதப்படுத்தப்பட்டது குறித்துப் பேசிய அவர், இது சட்டம் ஒழுங்கைச் சீர்குலைக்கவும், தற்போதைய ஆட்சிக்குக் கெட்ட பெயரை உண்டாக்கவும் சில சாதியவாத, மதவாத கும்பல்கள் செய்யும் திட்டமிட்ட சதி என்று கவலை தெரிவித்தார். சில நாட்களுக்கு முன்பு வரை திமுகவுடன் நட்பு ரீதியிலான கூட்டணி தொடர்வதாகக் கூறிவந்த திருமாவளவன், தற்போது தவெக கூட்டணியில் இருப்பதாகக் கூறியிருப்பது அரசியல் வட்டாரத்திலும் சமூக வலைதளங்களிலும் பெரும் விவாதத்தையும், அவரது பேச்சு மாறி மாறி இருப்பதாக விமர்சனங்களையும் எழுப்பியுள்ளது.