“திருட வந்தது ஒரு குத்தமாடா”… திருடர்களுக்கு கொடுக்கப்பட்ட வினோத தண்டனை… கனவுல கூட நினைச்சிருக்க மாட்டாங்க… இணையத்தை கலக்கும் வீடியோ…!

இந்தோனேசியாவில் உள்ள ஒரு குடியிருப்புப் பகுதியில், தொடர் திருட்டுகளால் கடுப்பாகிப் போயிருந்த பொதுமக்கள் நள்ளிரவில் கடையொன்றுக்குள் புகுந்த நான்கு கொள்ளையர்களைக் கையும் களவுமாகப் பிடித்துள்ளனர். பொதுவாக இதுபோன்ற சூழல்களில் மக்கள் சட்டத்தைக் கையில் எடுத்துக்கொண்டு திருடர்களைக் கடுமையாகத் தாக்குவது வழக்கம். ஆனால், இங்குள்ள பொதுமக்கள் வன்முறையைத் தவிர்த்து, சற்றும் எதிர்பாராத ஒரு நூதனமான வழியைக் கையாண்டுள்ளனர். திருடர்கள் தப்பியோடாமல் இருக்க அவர்களை அடிக்காமல், ஆரஞ்சு நிற டக்ட் டேப்பைக் கொண்டு தலை முதல் கால் வரை அசைய முடியாதபடி ‘மமி’ போல முழுமையாகச் சுற்றிப் பிணைத்துள்ளனர்.

இதில் உச்சக்கட்ட சுவாரஸ்யம் என்னவென்றால், சும்மா கட்டிப்போடாமல் அந்தத் திருடர்களின் தலைப்பகுதியில் கார்ட்டூன் கதாபாத்திரங்களைப் போல டேப்பால் வினோதமான காதுகளை வடிவமைத்துள்ளனர். இதனால் அவர்கள் பார்ப்பதற்குப் புகழ்பெற்ற ‘டெலிடப்பீஸ்’ கார்ட்டூன் போலவும், எகிப்திய மமிகள் போலவும் காட்சியளித்துள்ளனர். இந்த விசித்திரமான தண்டனைக் காட்சி அடங்கிய வீடியோ தற்பொழுது சமூக வலைத்தளங்களில் வெளியாகி, பார்ப்பவர்களைச் சிரிப்பலைகளில் ஆழ்த்தியதோடு உலகளவில் பயங்கர ட்ரெண்டாகி வருகிறது.

இந்த வீடியோ இணையத்தில் காட்டுத்தீயாய் பரவியதைத் தொடர்ந்து, நெட்டிசன்கள் மத்தியில் காரசாரமான விவாதங்கள் எழுந்துள்ளன. ஒரு தரப்பினர், “திருடர்களை அடித்துத் துன்புறுத்தாமல், சட்டத்தைக் கையில் எடுக்காமல் பாதுகாப்பாகக் கட்டிப்போட்ட பொதுமக்களின் ஐடியா சூப்பர்” என்று பாராட்டி வருகின்றனர். ஆனால், மறுதரப்பினரோ, “அவர்கள் திருடர்களாகவே இருந்தாலும் பொதுவெளியில் இப்படி அவமானப்படுத்துவது மனித உரிமை மீறல்; இது சட்டப்படி தவறு” என்று தங்களது எதிர்ப்புகளைப் பதிவிட்டு வருகின்றனர். எது எப்படியோ, இந்தோனேசியத் திருடர்களின் இந்த ‘கார்ட்டூன் அவதாரம்’ தற்போது இணையவாசிகளைப் பெரிதும் கவர்ந்து விவாதப் பொருளாக மாறியுள்ளது.