கேஸ் சிலிண்டர் தட்டுப்பாடு பிரச்னையால் மக்கள் விழிபிதுங்கி நிற்கின்றனர். இந்நிலையில், தமிழகத்தின் பெட்ரோல் கையிருப்பு இம்மாதம்(மார்ச்) வரை மட்டுமே இருப்பதாக அமைச்சர் சக்கரபாணி தெரிவித்துள்ளார். கேஸ் சிலிண்டர் தட்டுப்பாடு மற்றும் பெட்ரோல் கையிருப்பு குறித்த அமைச்சரின் விளக்கம் மக்களிடையே பெரும் குழப்பத்தையும், தேவையற்ற அச்சத்தையும் ஏற்படுத்தியுள்ளது. தற்போதைய சூழலில் பெட்ரோலுக்குத் தட்டுப்பாடு இல்லை என்று அரசு உறுதியளித்தாலும், அச்சத்தின் காரணமாக மக்கள் பெட்ரோலை கேன்களில் சேமித்து வைப்பது நிலைமையை இன்னும் மோசமாக்குவதோடு, பாதுகாப்பற்ற சூழலையும் உருவாக்குகிறது.
வதந்திகளால் தூண்டப்படும் இத்தகைய பீதி, கையிருப்பை வேகமாகத் தீரச் செய்து, உண்மையில் தட்டுப்பாடு இல்லாத பொருளுக்கும் செயற்கையான பற்றாக்குறையை உருவாக்கிவிடும் என்பதால், மக்கள் பொறுப்புடன் செயல்படுவது அவசியம். அதேசமயம், எரிபொருள் விநியோகச் சங்கிலியில் உள்ள தடைகளை அரசு போர்க்கால அடிப்படையில் சரிசெய்து, தடையற்ற விநியோகத்தை உறுதி செய்வதன் மூலமே மக்களின் அச்சத்தைப் போக்கி, இயல்பு நிலையைத் திரும்பக் கொண்டுவர முடியும்.