உத்தரப் பிரதேச மாநிலம் கான்பூரில் நடைபெற்ற பி.எட். நுழைவுத் தேர்வு மையத்திற்கு வெளியே, சாக்கடைக் கால்வாயின் கான்கிரீட் மூடி உடைந்ததில் சுமார் 25 தேர்வர்கள் சாக்கடைக்குள் விழுந்த சம்பவம் பெரும் பரபரப்பை ஏற்படுத்தியுள்ளது. மாக்ராபர்ட்கஞ்ச் பகுதியில் உள்ள எச்.என்.மிஸ்ரா பி.ஜி கல்லூரி தேர்வு மையத்திற்கு வெளியே ஞாயிற்றுக்கிழமை காலை இந்த விபத்து நிகழ்ந்துள்ளது.
தேர்வு மையத்திற்குள் நுழைவதற்கு முன்னதாக, ஆதார் கார்டு உள்ளிட்ட சில முக்கிய ஆவணங்களின் நகல்கள் (Photocopies) தேவைப்படுவதாகக் கடைசி நேரத்தில் மாணவர்களுக்குத் தகவல் தெரிவிக்கப்பட்டுள்ளது. இதனால், தேர்வு மையத்தின் அருகே இருந்த நகல் எடுக்கும் கடையின் (Photocopy shop) முன்பாக ஏராளமான தேர்வர்களும், அவர்களது பெற்றோர்களும் ஒரே நேரத்தில் குவிந்துள்ளனர். அங்கு சாக்கடைக் கால்வாயை மூடியிருந்த பழைய கான்கிரீட் சிலாப், கூட்டத்தின் அதிகப்படியான எடையைத் தாங்க முடியாமல் திடீரென உடைந்து உள்வாங்கியது.
இந்த விபத்தில் 20 முதல் 25 தேர்வர்கள் திடீரென சாக்கடைக்குள் விழுந்தனர். உள்ளூர் மக்களும், மற்ற மாணவர்களும் உடனடியாகச் செயல்பட்டு சாக்கடையில் விழுந்தவர்களை மீட்டனர். இதில் 4 பேருக்கு லேசான காயம் ஏற்பட்டதுடன், பலருடைய உடைகள், புத்தகங்கள் மற்றும் தேர்வுக்கூட அனுமதிச் சீட்டுகள் (Admit cards) பாழாகின. இதனால் ஆத்திரமடைந்த மாணவர்களும் பெற்றோர்களும் நகராட்சி நிர்வாகத்தின் அலட்சியப் போக்கைக் கண்டித்து அங்கு போராட்டத்தில் ஈடுபட்டனர். இருப்பினும், பலத்த பாதுகாப்புடன் திட்டமிட்டபடி தேர்வு நடத்தி முடிக்கப்பட்டதாகக் காவல்துறை தெரிவித்துள்ளது.