சீனாவின் ஜெஜியாங் மாகாணத்தைச் சேர்ந்த 32 வயது இளைஞர் ஒருவருக்கு, அவர் சிறுவயதில் விழுங்கிய பாதரச தெர்மோமீட்டர் 20 ஆண்டுகளுக்குப் பிறகு அறுவை சிகிச்சை மூலம் வெற்றிகரமாக அகற்றப்பட்டுள்ளது. தனது 12 வயதில் விளையாட்டாகத் தெர்மோமீட்டரை விழுங்கிய அந்த இளைஞர், பயத்தின் காரணமாக யாரிடமும் சொல்லாமல் மறைத்துள்ளார். நீண்ட காலமாக எவ்வித அறிகுறியும் இல்லாத நிலையில், சமீபத்தில் ஏற்பட்ட கடுமையான வயிற்று வலி காரணமாக அவர் மருத்துவமனையில் அனுமதிக்கப்பட்டார். அங்கு அவருக்கு எடுக்கப்பட்ட எக்ஸ்ரே சோதனையில், சிறுகுடலுக்கு அருகில் அந்தத் தெர்மோமீட்டர் முழுமையாக இருப்பது கண்டறியப்பட்டு மருத்துவர்களையே அதிர்ச்சியில் ஆழ்த்தியது.
உடனடியாகச் செயல்பட்ட மருத்துவக் குழுவினர், சுமார் 20 நிமிட நுணுக்கமான அறுவை சிகிச்சை மூலம் அந்தத் தெர்மோமீட்டரை உடலில் இருந்து வெளியே எடுத்தனர். வியப்பிற்குரிய விஷயமாக, அந்தத் தெர்மோமீட்டர் இத்தனை ஆண்டுகளாக உடைந்தோ அல்லது சேதமடைந்தோ போகாமல் அப்படியே முழுமையாக இருந்துள்ளது. ஒருவேளை அது உடைந்திருந்தால், அதிலுள்ள நச்சுத்தன்மை கொண்ட பாதரசம் உடல் முழுவதும் பரவி உயிருக்கே ஆபத்தாக முடிந்திருக்கும் என்றும், அந்த இளைஞர் நூலிழையில் உயிர் தப்பியுள்ளதாகவும் மருத்துவர்கள் ஆச்சரியத்துடன் தெரிவித்துள்ளனர்.