“அண்ணாமலை குறித்து தமிழிசையிடம் அமித்ஷா கேட்ட அந்த கேள்வி”…. சைலண்டான டெல்லி கூட்டம்… தமிழக பாஜகவில் அமித் ஷா நடத்தப்போகும் அதிரடி ஆப்பரேஷன்…!

தமிழக பாஜகவின் எதிர்காலம், தேர்தல் தோல்வி மற்றும் முன்னாள் மாநிலத் தலைவர் அண்ணாமலையின் விலகல் ஆகியவை குறித்து டெல்லியில் நடைபெற்ற அக்கட்சியின் மாநில மையக்குழு கூட்டம் அரசியல் வட்டாரங்களில் பெரும் பரபரப்பை ஏற்படுத்தியுள்ளது. அண்ணாமலை கட்சியை விட்டு விலகிய பிறகு நடைபெற்ற முதல் கூட்டம் என்பதால், இதன் மீது அனைவரின் கவனமும் திரும்பியிருந்தது. இந்த ஆலோசனைக் கூட்டத்தில் மத்திய உள்துறை அமைச்சர் அமித் ஷா, தேசிய நிர்வாகி நிதின் நபீன், பி.எல். சந்தோஷ் மற்றும் தமிழக பாஜக தலைவர் நயினார் நாகேந்திரன் உள்ளிட்ட முக்கிய நிர்வாகிகள் பங்கேற்று, கட்சியின் அடுத்தகட்ட நகர்வுகள் குறித்து விரிவாக விவாதித்துள்ளனர்.

இக்கூட்டத்தில் தமிழகத்தின் தற்போதைய அரசியல் சூழல் குறித்துப் பேசிய அமித் ஷா, திமுகவுக்கு மாற்றாக தமிழக வெற்றிக் கழகம் ஆட்சிக்கு வந்திருப்பதே தற்போதைய நிலை என்றும், அக்கட்சியின் அதிவேக வளர்ச்சியைத் தாங்கள் எதிர்பார்க்கவில்லை என்றும் குறிப்பிட்டுள்ளார். மேலும், தவெக-வின் இந்த அசுர வளர்ச்சியை அண்ணாமலை முன்கூட்டியே கணித்து எச்சரித்ததாகவும், ஆனால் கட்சி அதைச் சரியாகப் புரிந்துகொள்ளவில்லை என்றும் அவர் சுட்டிக்காட்டியுள்ளார். கடந்த தேர்தல் தோல்விகள் குறித்து விவாதிப்பதைக் கைவிட்டு, கட்சியின் எதிர்கால வளர்ச்சியில் அனைவரும் கவனம் செலுத்த வேண்டும் என்று அவர் வலியுறுத்தியுள்ளார்.

அண்ணாமலையின் விலகல் குறித்துப் பேசிய அமித்ஷா, ஒரு தனிநபரைவிட அமைப்பும் நாட்டின் நலனும் பெரியது என்று திட்டவட்டமாகக் கூறியுள்ளார். கடந்த காலங்களில் பல முக்கிய தலைவர்கள் கட்சியை விட்டு வெளியேறியபோதும் கட்சி பாதிக்கப்படவில்லை என்பதை நினைவுகூர்ந்த அவர், அண்ணாமலை தற்போது தனக்கென ஒரு தனி அரசியல் பாதையைத் தேர்வு செய்துள்ளார், அவர் அந்தப் பாதையிலேயே செல்லட்டும் எனக் குறிப்பிட்டுள்ளார். குறிப்பாக, “அண்ணாமலை பற்றி இனிமேல் கட்சியில் யாரும் பொதுவெளியில் பேசக் கூடாது” என்று அமித் ஷா உத்தரவிட்டுள்ளது தமிழக பாஜக வட்டாரங்களில் விவாதப் பொருளாக மாறியுள்ளது.

இறுதியாக, அண்ணாமலை குறித்து ஊடகங்களில் விமர்சித்த முன்னாள் மாநிலத் தலைவர் தமிழிசை சௌந்தரராஜனின் செயல்பாட்டிற்கு அமித் ஷா தனது அதிருப்தியை வெளிப்படுத்தியதாகத் தெரிகிறது. மாநிலத் தலைவர் நயினார் நாகேந்திரனே அமைதியாக இருக்கும்போது, பொதுவெளியில் கருத்து கூற வேண்டிய அவசியம் என்ன என்று அவர் கேள்வி எழுப்பியுள்ளார். மேலும், தமிழக பாஜகவில் விரைவில் பெரிய அளவில் அமைப்பு ரீதியான மாற்றங்கள் செய்யப்படும் என்றும், செயல்படாத நிர்வாகிகளுக்குப் பொறுப்புகள் மறுக்கப்பட்டு, இளைஞர்களுக்கு அதிக முக்கியத்துவம் அளிக்கப்படும் என்றும் அமித் ஷா எச்சரித்துள்ளார்.