அதிமுக தலைமையிலான கூட்டணியில் அடுத்தடுத்த அரசியல் நகர்வுகள் சூடுபிடிக்கத் தொடங்கியுள்ளன. ஏற்கனவே மருதம் மக்கள் முன்னேற்றக் கழகம் தனது ஆதரவை தெரிவித்திருந்த நிலையில், தற்போது கொங்குநாடு முன்னேற்ற கழகமும் (கொமுக) அதிமுக கூட்டணியில் அதிகாரப்பூர்வமாக இணைந்துள்ளது. அக்கட்சியின் பொதுச்செயலாளர் தங்கவேலு, தனது கட்சி நிர்வாகிகளுடன் சேலத்திற்குச் சென்று அதிமுக பொதுச்செயலாளர் எடப்பாடி பழனிசாமியை நேரில் சந்தித்துப் பேசினார். இந்த சந்திப்பின் போது, கொமுக நிர்வாகிகளுக்குப் பூங்கொத்து கொடுத்து ஈபிஎஸ் உற்சாக வரவேற்பு அளித்தார்.
இந்தச் சந்திப்பு வெறும் மரியாதை நிமித்தமானது மட்டுமன்றி, வரும் 2026 சட்டமன்றத் தேர்தலை மையமாகக் கொண்ட முக்கிய அரசியல் நகர்வாகவும் பார்க்கப்படுகிறது. 2026 தேர்தலில் அதிமுக கூட்டணிக்குத் தங்களது முழுமையான ஆதரவை வழங்குவதாகக் கூறி, அதற்கான அதிகாரப்பூர்வ கடிதத்தை தங்கவேலு ஈபிஎஸ்ஸிடம் நேரில் வழங்கினார். கொங்கு மண்டலத்தில் செல்வாக்குள்ள கட்சிகள் அதிமுகவை நோக்கி வருவது, அக்கட்சியின் தேர்தல் களத்தை வலுப்படுத்தும் ஒரு முக்கிய காரணியாகக் கருதப்படுகிறது.