தமிழ்நாட்டில் ஏழை எளிய பெண்களுக்கு மானிய விலையில் சானிட்டரி நாப்கின்கள் கிடைப்பதை உறுதி செய்யும் வகையில், ‘முதல்வர் மருந்தகங்கள்’ திட்டத்தின் கீழ் அவற்றை விற்பனை செய்ய அரசு திட்டமிட்டுள்ளதாக சென்னை உயர் நீதிமன்றத்தில் தெரிவிக்கப்பட்டுள்ளது. ரேஷன் கடைகளில் இலவசமாகவோ அல்லது மானிய விலையிலோ நாப்கின் வழங்கக் கோரி லட்சுமி ராஜா தொடர்ந்த பொதுநல வழக்கில், சுமார் 4,000 கோடி ரூபாய் செலவாகும் என்பதால் ரேஷன் கடைகளில் விநியோகிக்கும் திட்டம் தற்போதைக்கு இல்லை என அரசு தரப்பில் விளக்கமளிக்கப்பட்டது. இருப்பினும், 1,000-க்கும் மேற்பட்ட முதல்வர் மருந்தகங்கள் மூலம் மலிவு விலையில் மருந்துகள் மற்றும் சுகாதாரப் பொருட்களை வழங்க நடவடிக்கை எடுக்கப்பட்டு வருவதாகவும், இதன் மூலம் பெண்களின் மாதவிடாய் கால சுகாதாரத்தைப் பேண முடியும் என்றும் அரசு கூறியது. இதனைப் பதிவு செய்த நீதிபதிகள், பொருளாதார ரீதியாகப் பின்தங்கிய பெண்களின் விவரங்கள் மற்றும் முதல்வர் மருந்தக விரிவாக்கம் குறித்த கூடுதல் அறிக்கையைத் தாக்கல் செய்ய உத்தரவிட்டு விசாரணையை ஒத்திவைத்தனர்.
