நடிகர் விஜய் அரசியலில் முழுமையாக ஈடுபடுவதற்கு முன்னதாக நடிக்கும் கடைசித் திரைப்படம் ‘ஜனநாயகன்’ (தளபதி 69) என்று அறிவிக்கப்பட்டிருந்தது. ஆனால், தற்போது இது அவரது கடைசிப் படமாக இருக்காது என்றும், அவர் மற்றொரு புதிய படத்தில் நடிக்க வாய்ப்பிருப்பதாகவும் வெளியாகி வரும் தகவல்கள் ரசிகர்களிடையே புதிய எதிர்பார்ப்பை ஏற்படுத்தியுள்ளன. எச். வினோத் இயக்கத்தில் உருவாகியுள்ள ‘ஜனநாயகன்’ திரைப்படம் தணிக்கை குழு சிக்கல்கள் மற்றும் இணையதள கசிவு போன்ற பல்வேறு சர்ச்சைகளைச் சந்தித்து வரும் நிலையில், விஜய்யின் அடுத்த நகர்வு குறித்த விவாதங்கள் கோலிவுட்டில் சூடுபிடித்துள்ளன.
விஜய் தனது அரசியல் கட்சியான தமிழக வெற்றிக் கழகத்தின் பணிகளில் தீவிரமாக இருந்தாலும், அவரது 70-வது படம் குறித்த பேச்சுகள் அடிபடுகின்றன. குறிப்பாக, முன்னணி தயாரிப்பு நிறுவனம் ஒன்று விஜய்யை மீண்டும் ஒருமுறை திரையில் கொண்டு வர முயற்சிப்பதாகவும், இது குறித்த அதிகாரப்பூர்வ அறிவிப்பு விரைவில் வெளியாகலாம் என்றும் கூறப்படுகிறது. ஒருவேளை விஜய் மற்றொரு படத்தில் நடித்தால், அது அவரது அரசியல் பயணத்திற்குத் தடையாக இருக்குமா அல்லது கூடுதல் பலமாக அமையுமா என்பதைப் பொறுத்திருந்துதான் பார்க்க வேண்டும்.