தமிழக அரசியல் வரலாற்றில் ஒரு முக்கியத் திருப்புமுனையாக, தமிழக வெற்றிக் கழகத்தின் தலைவர் விஜய் இன்று தமிழகத்தின் 18-வது முதலமைச்சராகப் பதவியேற்றுள்ளார். மறைந்த முன்னாள் முதல்வர் எம்.ஜி.ஆருக்குப் பிறகு, திரையுலகிலிருந்து நேரடியாக அரசியல் கட்சி தொடங்கி, குறுகிய காலத்தில் மாநிலத்தின் உயரிய பதவியை எட்டிய நடிகர் என்ற பெருமையை அவர் பெற்றுள்ளார். சுமார் 49 ஆண்டுகளுக்குப் பிறகு ஒரு திரை நட்சத்திரம் தமிழகத்தின் முதல்வராகப் பொறுப்பேற்கும் இந்த நிகழ்வு, இந்திய அரசியலையே உற்றுநோக்க வைத்துள்ளது.
சென்னை நேரு உள்விளையாட்டு அரங்கில் பிரம்மாண்டமாக நடைபெற்ற இந்த விழாவில், விஜய்யின் பெற்றோர் எஸ்.ஏ. சந்திரசேகர் – ஷோபா சந்திரசேகர் மற்றும் அவரது குடும்பத்தினர் முன்னிலை வகித்தனர். திரைத்துறையைச் சேர்ந்த முக்கியப் பிரபலங்கள் பலர் கலந்துகொண்ட நிலையில், நடிகை த்ரிஷா முதல் வரிசையில் அமர்ந்து இந்த வரலாற்றுத் தருணத்தைக் கண்டு ரசித்தது சமூக வலைதளங்களில் பேசுபொருளாகியுள்ளது. விஜய்யின் இந்த அரசியல் பயணம், திரைத்துறையினரிடமும் பெரும் உற்சாகத்தை ஏற்படுத்தியுள்ளது.
பதவியேற்பு விழா ஒருபுறம் உற்சாகமாக நடைபெற, மறுபுறம் விஜய்யின் தனிப்பட்ட அடையாளங்கள் குறித்த விவாதங்கள் இணையத்தில் சூடுபிடித்துள்ளன. அவரை ஒரு தரப்பினர் “தமிழர்” என உரிமை கொண்டாட, மற்றொரு தரப்பினர் அவரது “தெலுங்கு வம்சாவளி” பின்னணி குறித்து விவாதித்து வருகின்றனர். குறிப்பாக, அவரது தந்தை எஸ்.ஏ. சந்திரசேகர் முன்பு அளித்த பேட்டிகளில், தான் ஒரு கிறிஸ்தவர் என்றும், தனது மனைவி ஷோபா முதலியார் சமூகத்தைச் சேர்ந்தவர் என்றும் குறிப்பிட்டிருந்த வீடியோக்கள் தற்போது அதிகளவில் பகிரப்பட்டு வருகின்றன.
விஜய்யின் பூர்வீகம் ராமநாதபுரம் மாவட்டம் முத்துப்பேட்டை கிராமம் என்பது போன்ற தகவல்களும் தற்போது வெளிச்சத்திற்கு வந்துள்ளன. அவரது தாத்தா ரயில்வே அதிகாரியாகவும், பாட்டி ஆசிரியையாகவும் பணியாற்றிய நிலையில், அங்கிருந்து சென்னை வந்த எஸ்.ஏ. சந்திரசேகர் திரையுலகில் சாதித்தார். இந்தச் சூழலில், “ஒரு தலைவர் முதல்வராகப் பதவியேற்ற பிறகு அவரது சாதி, மதம் அல்லது மொழி அடையாளங்களை விட, அவர் மக்களுக்கு வழங்கப்போகும் ஆட்சியின் தரம் மற்றும் நேர்மைக்கே முக்கியத்துவம் அளிக்க வேண்டும்” என அரசியல் விமர்சகர்கள் கருத்து தெரிவித்து வருகின்றனர்.