ஓபிஎஸ் முதல் வைத்திலிங்கம் வரை.. எடப்பாடிக்குத் தெரியாமல் நடந்த ‘மைக்ரோ லெவல்’ ஆபரேஷன்.. ஸ்டாலின் போட்ட அந்த 20 தொகுதி ஸ்கெட்ச்..!!

தமிழகத்தில் 2026 சட்டசபைத் தேர்தல் களம் தற்போதே சூடுபிடிக்கத் தொடங்கியுள்ளது. ஆளுங்கட்சியான திமுக, எதிர்க்கட்சியான அதிமுகவைச் சிதைக்கும் நோக்கில் அக்கட்சியின் முக்கியத் தலைவர்களைத் தன் பக்கம் இழுப்பதில் தீவிரம் காட்டி வருகிறது. சமீபகாலமாக ஓ.பன்னீர்செல்வம், வைத்திலிங்கம், மனோஜ் பாண்டியன், அன்வர் ராஜா, மைத்ரேயன், நிலோஃபர் கஃபீல் என அதிமுகவின் முன்னாள் அமைச்சர்கள், எம்.பி-க்கள் மற்றும் எம்.எல்.ஏ-க்கள் என ஒரு பெரிய பட்டாளமே திமுகவில் ஐக்கியமாகி வருகிறது. இந்த ‘இணைப்புப் படலத்தின்’ பின்னணியில் முதல்வர் ஸ்டாலின் ஒரு நுணுக்கமான அரசியல் கணக்கை வைத்துள்ளார்.

அதிமுகவில் இருந்து வருபவர்களை வெறும் பெயருக்காகத் திமுக சேர்க்கவில்லை; அவர்கள் அந்தந்த பகுதிகளில் பெற்றுள்ள செல்வாக்கை அறுவடை செய்யவே அறிவாலயம் திட்டமிட்டுள்ளது. உதாரணமாக, கரூர் மாவட்டத்தைச் செந்தில் பாலாஜி மூலம் திமுக வசப்படுத்தியது போல, தற்போது டெல்டா பகுதியில் வைத்திலிங்கம் மூலமாகவும், தென் மாவட்டங்களில் ஓ.பி.எஸ் மற்றும் மனோஜ் பாண்டியன் மூலமாகவும் அதிமுகவின் கோட்டைகளைத் தகர்க்கத் திமுக முயல்கிறது. குறிப்பாக, சுமார் 20 சட்டசபைத் தொகுதிகளை இந்த ‘புதிய வரவுகளுக்கு’ ஒதுக்கீடு செய்து, அங்கெல்லாம் வெற்றியை உறுதி செய்யத் திமுக தலைமை திட்டமிட்டுள்ளது.

இந்த அதிரடி மாற்றங்கள் அதிமுகவின் வாக்கு வங்கியில் பெரும் சரிவை ஏற்படுத்தும் எனக் கருதப்படுகிறது. அதிமுகவில் இருந்து வெளியேறுபவர்கள் வெறும் தலைவர்கள் மட்டுமல்ல, அவர்கள் பின்னணியில் இருக்கும் களப்பணியாளர்களும் திமுகவிற்கு மாறுவது எடப்பாடி பழனிசாமிக்கு பெரும் தலைவலியை ஏற்படுத்தியுள்ளது. அதிமுகவைச் சமூக ரீதியாகவும், கள ரீதியாகவும் பலவீனப்படுத்துவதன் மூலம், வரவிருக்கும் தேர்தலில் தங்களுக்குச் சாதகமான சூழலை உருவாக்க முடியும் எனத் திமுக நம்புகிறது. முக்குலத்தோர் சமூக வாக்குகள் அதிகம் உள்ள தேனி மற்றும் தென் மாவட்டங்களில் திமுகவின் கை ஓங்குவதற்கு இது ஒரு முக்கிய வாய்ப்பாகப் பார்க்கப்படுகிறது.

மறுபுறம், அதிமுகவின் முக்கியத் தூண்கள் சரிந்து வருவதைக் கண்டும் எடப்பாடி பழனிசாமி அமைதி காப்பது அக்கட்சியினரிடையே அதிருப்தியை ஏற்படுத்தியுள்ளது. 2021 தேர்தலில் அதிமுக கௌரவமான இடங்களைப் பிடித்ததற்கு இத்தகைய களப்பணியாளர்களே காரணம். ஆனால், இப்போது அவர்கள் வரிசையாகத் திமுகவிற்குச் செல்வது 2026-ல் அதிமுகவின் வெற்றி வாய்ப்பைப் பாதிக்கும் என அரசியல் விமர்சகர்கள் கருதுகின்றனர். மொத்தத்தில், ஒவ்வொரு தொகுதியிலும் ‘மைக்ரோ லெவல்’ திட்டமிடலுடன் களம் இறங்கியுள்ள முதல்வர் ஸ்டாலின், அதிமுகவின் பலத்தை முற்றிலும் குறைத்துத் தனது வெற்றியை உறுதி செய்வதில் குறியாக உள்ளார்.