“சென்னை டிராஃபிக்கிற்கு மெட்ரோ கொடுத்த செக்-மேட்… 16 நிமிடத்தில் ஆம்புலன்ஸ் டூ மருத்துவமனை.. மிரள வைக்கும் வேகம்!”

சென்னையில் உயிருக்குப் போராடும் நோயாளி ஒருவருக்குத் தேவையான தானமாகப் பெறப்பட்ட இதயம் மற்றும் நுரையீரலை, போக்குவரத்து நெரிசலில் சிக்காமல் விரைவாகக் கொண்டு செல்ல சென்னை மெட்ரோ ரயில் நிர்வாகம் (CMRL) ஒரு பிரத்யேக ரயிலை இயக்கி சாதனை படைத்துள்ளது. மதுரையிலிருந்து விமான ஆம்புலன்ஸ் மூலம் சென்னை விமான நிலையத்திற்கு கொண்டு வரப்பட்ட இந்த உறுப்புகள், மீனம்பாக்கம் மெட்ரோ ரயில் நிலையத்திலிருந்து டி.எம்.எஸ் (AG-DMS) நிலையத்திற்கு கொண்டு செல்லப்பட்டது.

வழக்கமாகச் சாலை மார்க்கமாகச் சென்றால் பல மணிநேரம் பிடிக்கும் இந்தத் தூரத்தை, மெட்ரோ ரயில் நிர்வாகத்தின் துரித நடவடிக்கையால் வெறும் 9 நிமிடங்களில் கடந்து சாதனை படைக்கப்பட்டுள்ளது. இந்த பயணத்தின் போது, மீனம்பாக்கத்தில் இருந்து டி.எம்.எஸ் வரை இடையில் உள்ள 7 ரயில் நிலையங்களிலும் அந்தத் தனி ரயில் எங்கும் நிற்காமல் சென்றது குறிப்பிடத்தக்கது. இதற்காக மெட்ரோ ரயில் கால அட்டவணையில் சிறிய மாற்றங்கள் செய்யப்பட்டு, ஒரு ‘பசுமை வழித்தடம்’ (Green Corridor) உருவாக்கப்பட்டது.

இந்த உயிர் காக்கும் பணியில் சென்னை மெட்ரோ அதிகாரிகள், நிலைய ஊழியர்கள் மற்றும் மருத்துவக் குழுவினர் ஒருங்கிணைந்து செயல்பட்டனர். டி.எம்.எஸ் நிலையத்தை அடைந்ததும், அங்கிருந்து காத்திருந்த ஆம்புலன்ஸ் மூலம் கிரீம்ஸ் சாலையில் உள்ள அப்பல்லோ மருத்துவமனைக்கு உறுப்புகள் கொண்டு செல்லப்பட்டன. ஒட்டுமொத்தமாக விமான நிலையத்திலிருந்து மருத்துவமனைக்குச் செல்ல வெறும் 16 நிமிடங்களே ஆனதாக மருத்துவமனை வட்டாரங்கள் தெரிவித்துள்ளன.

மதுரையைச் சேர்ந்த 17 வயது சிறுவனின் குடும்பத்தினர் எடுத்த உன்னதமான முடிவால், இன்று மூன்று பேருக்கு மறுவாழ்வு கிடைத்துள்ளது. 2023-ஆம் ஆண்டு மெட்ரோ ரயில் விதிகளில் கொண்டு வரப்பட்ட திருத்தங்களின்படி, அவசர மருத்துவத் தேவைகளுக்காக உறுப்புகளைக் கொண்டு செல்ல மெட்ரோ ரயிலைப் பயன்படுத்த அனுமதி உண்டு. அதனைச் சரியாகப் பயன்படுத்தி, ஒரு உயிரைக் காக்க சென்னை மெட்ரோ ரயில் கைகொடுத்திருப்பது பொதுமக்களிடையே பெரும் பாராட்டைப் பெற்றுள்ளது.