உத்தரப் பிரதேச மாநிலம் சஹாரன்பூரில் உள்ள நௌடா சமூக சுகாதார மையத்தில் (CHC) நடந்த நெகிழ்ச்சியான இச்சம்பவம், தற்போது சமூக ஊடகங்களில் வெளியாகி மக்களின் இதயங்களைத் தொட்டு வருகிறது. ஆயிஷா என்ற பெண் பிரசவத்திற்காக இந்த மருத்துவமனைக்கு அழைத்து வரப்பட்டார். புதிய வரவை ஆவலோடு எதிர்பார்த்திருந்த குடும்பத்தினருக்கு, குழந்தை பிறந்த அந்த நொடியில் பெரும் அதிர்ச்சி காத்திருந்தது. பிறந்த பச்சிளம் குழந்தை எந்தவொரு அசைவும் இன்றி, சுவாசிக்காமல் முற்றிலும் உயிரற்றுக் காணப்பட்டது. இதனால் பிரசவ அறையில் இருந்தவர்களின் மகிழ்ச்சி நொடிப் பொழுதில் பயமாகவும் கவலையாகவும் மாறியதுடன், குடும்பத்தினர் கண்ணீரில் மூழ்கினர்.
அந்த இக்கட்டான சூழ்நிலையில், அங்கிருந்த டாக்டர் ரூமா சிறிதும் பதற்றமடையாமல் நிலைமையைத் மிக சாதுரியமாகக் கையாண்டார். அசைவற்று இருந்த அந்தப் பச்சிளம் குழந்தைக்கு அவர் உடனடியாக முதலுதவி (CPR / Resuscitation) அளிக்கத் தொடங்கினார். முழுமையான கவனத்துடனும் விடாமுயற்சியுடனும் மருத்துவர் தொடர்ந்து பல நிமிடங்கள் போராடிய நிலையில், அறையில் இருந்த அனைவரும் ஒரு அற்புதத்திற்காகக் காத்திருந்தனர். அப்போது திடீரென, அனைவரின் கண்களிலும் ஆனந்தக் கண்ணீரை வரவழைக்கும் விதமாக, அந்தப் பச்சிளங்குழந்தையின் உடல் லேசாக அசைந்து மெதுவாக சுவாசிக்கத் தொடங்கியது. சில கணங்களுக்கு முன்பு வரை மரண பயம் சூழ்ந்திருந்த அந்த அறையில், குழந்தையின் மூச்சுச் சத்தம் கேட்டு நிம்மதியும் பெருமகிழ்ச்சியும் குடியேறியது.
தன் குழந்தை பாதுகாப்பாக மறுவாழ்வு பெற்றதைக் கண்ட தாய் ஆயிஷா உணர்ச்சிப் பெருக்கால் ஆனந்தக் கண்ணீர் வடித்தார். இந்த நெகிழ்ச்சியான தருணத்தை அங்கிருந்த ஒருவர் தனது கைப்பேசியில் வீடியோவாகப் பதிவு செய்ய, அது தற்போது இணையதளங்களில் காட்டுத்தீயாய் பரவி வைரலாகி வருகிறது. இக்காணொளியைப் பார்த்த நெட்டிசன்கள் பலரும், சமயோசித புத்தியால் ஒரு பிஞ்சு உயிரைக் காப்பாற்றிய டாக்டர் ரூமாவை “கடவுளின் அவதாரம்” என்று மனமாறப் பாராட்டி வருகின்றனர். இத்தகைய சம்பவங்கள், மருத்துவர்கள் மீதான சமூகத்தின் நம்பிக்கையையும் மரியாதையையும் மேலும் பலப்படுத்துவதாகப் பயனர்கள் நெகிழ்ச்சியுடன் தங்களது கருத்துக்களைப் பதிவிட்டு வருகின்றனர்.