“5 நாள் கெடு… தாக்குதலை நிறுத்திய டிரம்ப்!” – ஈரானுடன் ரகசியப் பேச்சுவார்த்தை… ஹார்மூஸ் நீரிணையில் அமையப்போகும் மெகா கூட்டணி..?

மேற்காசியாவில் போர் மேகங்கள் சூழ்ந்துள்ள நிலையில், ஈரான் மீதான ராணுவ நடவடிக்கைகளை அமெரிக்கா தற்காலிகமாக ஒத்திவைப்பதாக அதிபர் டிரம்ப் அறிவித்துள்ளார். ஈரானின் அணு உலைகள் மற்றும் முக்கிய எரிசக்தித் தளங்களைக் குறிவைத்து நடத்தப்படவிருந்த தாக்குதல்களை அடுத்த 5 நாட்களுக்கு நிறுத்தி வைப்பதாக அவர் தெரிவித்துள்ளார். இந்த இடைப்பட்ட காலத்தில் இரு நாடுகளுக்கும் இடையே சுமுகமான தீர்வு எட்டப்பட வாய்ப்புள்ளதாக வாஷிங்டன் வட்டாரங்கள் கருதுகின்றன.

தற்போது ஈரானின் உயர் அதிகாரிகளுடன் அமெரிக்கப் பிரதிநிதிகள் ரகசியப் பேச்சுவார்த்தையில் ஈடுபட்டு வருவதாகக் குறிப்பிட்டுள்ள டிரம்ப், விரைவில் இரு நாடுகளும் இணைந்து ஒரு விரிவான அமைதி ஒப்பந்தத்தில் கையெழுத்திடும் என நம்பிக்கை தெரிவித்துள்ளார். குறிப்பாக, உலக வர்த்தகத்தின் முக்கியப் பாதையான ஹார்மூஸ் நீரிணையின் பாதுகாப்பை உறுதி செய்யும் வகையில் இந்த ஒப்பந்தம் அமையும் என்றும், இதன் மூலம் பிராந்தியத்தில் நிரந்தர அமைதி திரும்பும் என்றும் அவர் கூறியுள்ளார்.