சென்னை ஆழ்வார்பேட்டையில் ‘வீ த லீடர்ஸ்’ அமைப்பின் சார்பில் நடைபெற்ற காமராஜர் விருது வழங்கும் விழாவில், அமைப்பின் நிறுவனர் அண்ணாமலை சாதனை புரிந்த பெண்களுக்கு விருதுகளை வழங்கிப் பேசினார். விழாவில் பேசிய அவர், தவெக ஆட்சியில் பெண் அமைச்சர்களின் எண்ணிக்கை 8 ஆக உயர்ந்துள்ளது என்றும், கட்சி மற்றும் கொள்கை வேறுபாடுகளைக் கடந்து இந்த நடவடிக்கையை உண்மையாகப் பாராட்ட வேண்டும் என்றும் குறிப்பிட்டார். மேலும், எதிர்காலத்தில் தமிழக ஆட்சியில் 35 அமைச்சர்களில் பாதியான 18 இடங்களைப் பெண்களுக்கு வழங்க வேண்டும் எனத் தெரிவித்ததுடன், 2029 நாடாளுமன்றத் தேர்தலில் பெண்களுக்கான 33 சதவீத இட ஒதுக்கீடு அமலுக்கு வரும்போது அதிகமான பெண்கள் நாடாளுமன்றத்திற்குச் செல்வார்கள் என்பதால், பெண்களுக்கு இப்போது இருந்தே பயிற்சி அளித்து தயார் செய்ய வேண்டும் என்றும் அவர் வலியுறுத்தினார்.
இருப்பினும், அண்ணாமலை தனது உரையில் தவறான புள்ளிவிவரத்தைக் குறிப்பிட்டுப் பேசியுள்ளது தற்பொழுது சர்ச்சையையும் விமர்சனங்களையும் ஏற்படுத்தியுள்ளது. தமிழகத்தில் அமைந்துள்ள தவெக அமைச்சரவையில் கீர்த்தனா, ஜெகதீஸ்வரி, விஜயலட்சுமி, கமலி ஆகிய 4 பெண் அமைச்சர்கள் மட்டுமே இடம் பெற்றுள்ள நிலையில், அவர் 8 பெண் அமைச்சர்கள் இருப்பதாகத் தவறாகக் குறிப்பிட்டுள்ளார். உண்மையிலேயே தவெக அமைச்சரவையில் பட்டியலினத்தைச் சேர்ந்த அமைச்சர்களின் எண்ணிக்கையே 8 ஆகும். பட்டியலின அமைச்சர்களின் எண்ணிக்கையை, பெண் அமைச்சர்களின் எண்ணிக்கை என மாற்றி அண்ணாமலை பேசியுள்ளது சுட்டிக்காட்டப்பட்டுள்ளது.
விஜய் தலைமையிலான தவெக அரசைத் திறந்த மனதோடு பாராட்டுவதாக நினைத்துக்கொண்டு, அண்ணாமலை இவ்வாறு தவறான புள்ளிவிவரங்களை மேடையில் வெளிப்படுத்தியுள்ளார் எனச் சமூக வலைதளங்களில் பல்வேறு தரப்பினரும் விமர்சித்து வருகின்றனர். பாராட்டு தெரிவிக்கும் அவசரத்தில் உண்மையான புள்ளிவிவரத்தைச் சரிபார்க்காமல் பேசியது குறித்து இணையவாசிகளிடையே விவாதங்கள் எழுந்துள்ளன.