திமுக-வின் திடீர் முடிவு! கோவையை அதிர வைக்கப்போகும் ‘மகேந்திரன் கார்டு’… அறிவாலயம் போட்ட அனல் பறக்கும் கணக்கு…!!!

2026 தமிழக சட்டமன்றத் தேர்தலை முன்னிட்டு அரசியல் களம் சூடுபிடித்துள்ள நிலையில், கோயம்புத்தூர் தெற்கு தொகுதியில் திமுக சார்பில் ஐடி விங் இணைச் செயலாளர் மகேந்திரன் போட்டியிட அதிக வாய்ப்புள்ளதாகத் தகவல்கள் வெளியாகியுள்ளன. கடந்த 2021 தேர்தலில் மக்கள் நீதி மய்யம் தலைவர் கமல்ஹாசனுக்காக இதே தொகுதியில் தேர்தல் வியூகங்களை வகுத்துக் கொடுத்த மகேந்திரன், தோல்விக்குப் பிறகு திமுகவில் இணைந்தார். தற்போது திமுக தலைமை மற்றும் முன்னாள் அமைச்சர் செந்தில் பாலாஜியின் முழு ஆதரவு அவருக்கு இருப்பதாகக் கூறப்படுகிறது.

கோவை தெற்கு தொகுதியைப் பொறுத்தவரை கடந்த இரண்டு தேர்தல்களில் திமுக தனது கூட்டணிக் கட்சியான காங்கிரஸுக்கே ஒதுக்கி வந்தது. இருப்பினும், இரண்டு முறையும் காங்கிரஸ் அங்கு தோல்வியைத் தழுவியதால், இம்முறை நேரடியாகத் தங்களின் வேட்பாளரை களம் இறக்க திமுக தலைமை முடிவு செய்துள்ளது. ஏற்கனவே இந்தத் தொகுதியில் கமல்ஹாசனுக்காகப் பணியாற்றிய அனுபவம் மகேந்திரனுக்குக் கூடுதல் பலமாகப் பார்க்கப்படுகிறது. தொகுதி மக்களின் நாடித் துடிப்பை அவர் நன்கு அறிந்திருப்பார் என்பதே இதற்கு முக்கிய காரணம்.

மேலும், மகேந்திரனின் குடும்ப உறவுகளும் திமுகவில் அவரது செல்வாக்கை உயர்த்தியுள்ளன. நாடாளுமன்ற உறுப்பினர் தமிழச்சி தங்கப்பாண்டியனின் குடும்பத்துடன் ஏற்பட்டுள்ள திருமண உறவு மற்றும் செந்தில் பாலாஜியுடன் இணைந்து அவர் கோவையில் மேற்கொண்டு வரும் களப்பணிகள் அவருக்கு சீட் கிடைப்பதை உறுதி செய்யும் என எதிர்பார்க்கப்படுகிறது. அதே சமயம், சிட்டிங் எம்.எல்.ஏ வானதி சீனிவாசன் இம்முறை கோவை வடக்கு தொகுதிக்கு மாறக்கூடும் என்ற பேச்சும் மகேந்திரனுக்குச் சாதகமான சூழலை உருவாக்கியுள்ளது.

சிறுபான்மையினர் மற்றும் பல்வேறு சமூக மக்கள் கணிசமாக வசிக்கும் இத்தொகுதியில், திமுக நேரடியாகப் போட்டியிடுவது அக்கட்சியினரிடையே உற்சாகத்தை ஏற்படுத்தியுள்ளது. தவெக போன்ற புதிய கட்சிகள் பிரிக்கும் வாக்குகள் திமுகவிற்குப் பாதிப்பை ஏற்படுத்தாது என்றும், மகேந்திரன் போன்ற வலுவான வேட்பாளரை நிறுத்தினால் வெற்றி நிச்சயம் என்றும் திமுக தலைமை கணக்கு போடுகிறது. விரைவில் வெளியாகவுள்ள வேட்பாளர் பட்டியலில் மகேந்திரனின் பெயர் இடம்பெறுமா என்பதைப் பொறுத்திருந்துதான் பார்க்க வேண்டும்.