உத்தரப் பிரதேச மாநிலம் ஜான்சி மாவட்டத்திற்கு உட்பட்ட குர்சராய் காவல் எல்லைக்குட்பட்ட நாராயண்புரா பகுதியில், மதுப்பழக்கத்திற்குப் பலியானவர்களின் மரணங்கள் அப்பகுதி பெண்களிடையே கடும் கொந்தளிப்பை ஏற்படுத்தின. தங்களின் குடும்பங்களையும் வாழ்வாதாரத்தையும் சீரழிக்கும் மதுவுக்கு எதிராக வெகுண்டெழுந்த பெண்கள், அப்பகுதியில் செயல்பட்டு வந்த மதுபானக் கடைக்குள் திரளாகப் புகுந்து திடீர் தாக்குதல் நடத்தினர். கடையில் அடுக்கி வைக்கப்பட்டிருந்த பல லட்சம் ரூபாய் மதிப்புள்ள மது பாட்டில்களை அடித்து நொறுக்கியதோடு, அவற்றை நடுரோட்டில் வீசி உடைத்துத் தங்களின் கடும் எதிர்ப்பை வெளிப்படுத்தினர்.
அவர்களின் கட்டுக்கடங்காத ஆத்திரத்தைக் கண்டு கடை ஊழியர்களும் பொதுமக்களும் அச்சத்தில் பின்வாங்கினர். சம்பவ இடத்திற்கு வந்த காவல்துறையினரால் கூட திரண்டு நின்ற பெண்களின் ஆவேசத்தைத் தடுத்து நிறுத்த முடியாமல், அமைதியாக வேடிக்கை மட்டுமே பார்க்க முடிந்தது. உயிரிழப்புகளுக்குக் காரணமான மதுவிற்பனைக்கு முற்றுப்புள்ளி வைக்க வேண்டும் என்ற நோக்கில் பெண்கள் ஒன்றிணைந்து நடத்திய இந்த அதிரடி நடவடிக்கை, அந்தப் பகுதி முழுவதும் பெரும் பரபரப்பை ஏற்படுத்தியுள்ளது.