“சுயமரியாதையுடன் விடைபெறுகிறோம்…!” – போட்டி முடிந்ததும் உடை மாற்றும் அறையில்… ஈரான் அணி செய்த அந்த நெகிழ்ச்சி காரியம்…!!

உலகக் கோப்பை கால்பந்து தொடரில் ஈரான் மற்றும் பெல்ஜியம் அணிகளுக்கு இடையிலான விறுவிறுப்பான லீக் போட்டி, லாஸ் ஏஞ்சல்ஸ் நகரில் உள்ள புகழ்பெற்ற சோஃபி மைதானத்தில் நடைபெற்றது. இரு அணிகளும் வெற்றிக்காகக் கடுமையாகப் போராடிய இந்த ஆட்டம், ரசிகர்களுக்குப் பெரும் விறுவிறுப்பை ஏற்படுத்தியதோடு, இறுதியில் 0-0 என்ற கோல் கணக்கில் சமனில் முடிவடைந்தது.

போட்டி நிறைவடைந்த பிறகு, ஈரான் கால்பந்து அணியினர் தங்களது உடை மாற்றும் அறையில் ஒரு உருக்கமான கையெழுத்துக் கடிதத்தை விட்டுச் சென்றுள்ளனர். அதில், “ஆயிரக்கணக்கான ஆண்டுகளுக்கு முன்பு இருந்த பண்டைய பாரசீகம் முதல் இன்றைய நவீன ஈரான் வரை, எங்களது நாட்டின் ஆன்மா எப்போதும் உறுதியுடன் இருக்கும்; நாங்கள் மிகுந்த பெருமையுடன் இங்கு வந்தோம், கடுமையாகப் போட்டியிட்டோம், அதேபோல் எங்களது சுயமரியாதையுடன் இங்கிருந்து விடைபெறுகிறோம்” என்று தங்களின் கம்பீரத்தையும் நெகிழ்ச்சியையும் பதிவு செய்துள்ளனர்.

மேலும், தங்களுக்குச் சிறப்பான விருந்தோம்பல் அளித்த லாஸ் ஏஞ்சல்ஸ் நிர்வாகத்திற்கும், சோஃபி மைதானத்தில் நடைபெற்ற இரண்டு போட்டிகளிலும் தங்களுக்குத் திரண்டு வந்து ஆதரவளித்த ரசிகர்களுக்கும் ஈரான் அணியினர் தங்களது மனமார்ந்த நன்றியைத் தெரிவித்துக் கொண்டனர். அத்துடன், உலக நாடுகள் இடையே எப்போதும் அமைதி, நட்பு மற்றும் பரஸ்பர மரியாதை தொடர வேண்டும் என்ற உன்னதமான கோரிக்கையையும் முன்வைத்து தங்களது கடிதத்தை நிறைவு செய்துள்ளனர்.