அரசுப் பணத்தில் படித்துவிட்டு துரோகமா… ஒரே நேரத்தில் மாயமான 1,420 அரசு டாக்டர்கள்… அதிர்ச்சியில் தமிழக சுகாதாரத்துறை… வட்டியோடு வசூலிக்க அரசு போட்ட மாஸ்டர் பிளான்…!

தமிழக அரசு மருத்துவ அமைப்பையே உலுக்கும் வகையில், 1,420 அரசு மருத்துவர்கள் எவ்வித முன்னறிவிப்பும் இன்றி பணிக்கு வராமல் இருப்பது அதிகாரப்பூர்வமாக வெளிச்சத்துக்கு வந்துள்ளது. தமிழக அரசின் மருத்துவக் கல்வி மற்றும் ஆராய்ச்சி இயக்கம் (DME) வெளியிட்டுள்ள இந்தத் தகவல், பொதுமக்களிடையேயும் சுகாதாரத்துறையிலும் பெரும் அதிர்வலைகளை ஏற்படுத்தியுள்ளது. அரசு மருத்துவமனைகள் மற்றும் மருத்துவக் கல்லூரி மருத்துவமனைகளில் ஏற்படும் காலியிடங்கள் மருத்துவப் பணியாளர் தேர்வாணையம் மூலம் தொடர்ந்து நிரப்பப்பட்டு வரும் சூழலில், இத்தனை மருத்துவர்கள் திடீரெனப் பணியில் இல்லாதது அரசு மருத்துவ சேவையின் மீதான நம்பகத்தன்மையை கேள்விக்குறியாக்கியுள்ளது.

இந்த விவகாரத்தின் பின்னணியில் உள்ள முக்கியக் காரணம், மருத்துவர்களின் உயர்கல்வி ஒப்பந்த மீறலாகும். அரசு மருத்துவ அலுவலர்களாகப் பணியில் சேரும் மருத்துவர்கள், மேற்படிப்பு படிப்பதற்காக நீட் தேர்வு அடிப்படையில் அனுமதி பெறுகின்றனர். அவ்வாறு அனுமதி பெறும்போது, “பட்ட மேற்படிப்பு முடித்த பிறகு, பணி ஓய்வு பெறும் வரை அரசுப் பணியில் தொடர்ந்து சேவை செய்ய வேண்டும்” என்ற கடுமையான நிபந்தனை விதிக்கப்படுகிறது. சில குறிப்பிட்ட படிப்புகளுக்கு மட்டுமே பிணைத்தொகை செலுத்தி பணியிலிருந்து விலக வாய்ப்பளிக்கப்படுகிறது. ஆனால், இந்த நிபந்தனைகளை ஏற்று உயர்கல்வி முடித்த சில மருத்துவர்கள், அரசுக்குத் தெரிவிக்காமல் தனியார் மருத்துவமனைகளில் அதிக ஊதியத்திற்குப் பணியாற்றச் சென்றுள்ளது தற்போதைய ஆய்வில் கண்டறியப்பட்டுள்ளது.

பணிக்கு வராத மொத்தம் 1,420 மருத்துவர்களில், மருத்துவக் கல்வி மற்றும் ஆராய்ச்சித் துறையின் கீழ் 370 பேரும், பொது சுகாதாரம் மற்றும் நோய் தடுப்பு மருந்து துறையின் கீழ் 766 பேரும், மருத்துவம் மற்றும் ஊரக நலப்பணித் துறையின் கீழ் 284 பேரும் அடங்குவர். தற்போது இவர்களில் 1,420 மருத்துவர்கள் தொடர்ந்து பணிக்கு வராமல் இருப்பதாகத் தெரிவிக்கப்பட்டுள்ளது. இவர்களில் 680 பேர் மீது ஏற்கனவே ஒழுங்கு நடவடிக்கை எடுக்கப்பட்டுள்ள நிலையில், மீதமுள்ள 740 பேர் மீது நடவடிக்கைகள் தீவிரப்படுத்தப்பட்டுள்ளன. விதிகளை மீறியவர்களிடம் இருந்து பிணைத்தொகை மற்றும் அதற்கான வட்டித் தொகையை வசூலிக்கவும், பணிநீக்கம் உள்ளிட்ட கடுமையான சட்டப்பூர்வ நடவடிக்கைகளை எடுக்கவும் தமிழக சுகாதாரத்துறை தற்போது அதிரடி காட்டி வருகிறது.