பூனைகள் ராஜ்யத்தில் ஒரு குட்டி தேவதை…! 30 ஆண்டுகளுக்குப் பின் பிறந்த முதல் குழந்தை…. ஊரே சேர்ந்து கொடுத்த மெகா வரவேற்பு…!!

இத்தாலியின் ‘பாக்லியாரா டெய் மார்சி’ என்ற குக்கிராமத்தில் சுமார் 30 ஆண்டுகளுக்குப் பிறகு லாரா பஸ்ஸி என்ற பெண் குழந்தை பிறந்துள்ள சம்பவம் பெரும் நெகிழ்ச்சியை ஏற்படுத்தியுள்ளது. வெறும் 19 பேர் மட்டுமே வசித்து வந்த இந்த ஊரில், மனிதர்களை விடப் பூனைகளின் ஆக்கிரமிப்பே அதிகமாக இருந்து வந்தது.

இந்நிலையில், பல தசாப்தங்களாகக் குழந்தையின் அழுகுரலே கேட்காத அந்த வீதிகளில், தற்போது ஒரு மழலையின் வரவு அங்குள்ள மக்களுக்குப் புதிய வாழ்வாதார நம்பிக்கையை அளித்துள்ளது. இந்த மகிழ்ச்சியான நிகழ்வை அந்த ஊரே திருவிழாவாகக் கொண்டாடி தேவாலயங்களில் சிறப்பு வழிபாடுகளை நடத்தியுள்ளது.

மக்கள் தொகை சரிவைச் சந்திக்கத் தவிக்கும் இத்தாலி அரசு, அங்கு பிறக்கும் குழந்தைகளுக்குப் பல்வேறு ஊக்கத்தொகைகளை அறிவித்து வருகிறது. அதன் ஒரு பகுதியாக, இந்தக் குழந்தையின் பெற்றோருக்கு ஒரு லட்சம் ரூபாய் மதிப்பிலான போனஸ் தொகையும், பராமரிப்புக்காக மாதம் 40 ஆயிரம் ரூபாயும் வழங்கப்பட்டுள்ளது.

வேலைவாய்ப்பின்மை மற்றும் பொருளாதாரக் காரணங்களால் இளம் தலைமுறையினர் குழந்தை பெற்றுக்கொள்ளத் தயங்குவதால், அந்நாட்டில் பிறப்பு விகிதம் மிக மோசமாகப் பாதிக்கப்பட்டுள்ளது. இந்தச் சூழலில், சிறிய கிராமத்தில் பிறந்துள்ள இந்த முதல் குழந்தை, ஒட்டுமொத்த தேசத்திற்கும் மக்கள்தொகை மீட்சியின் அடையாளமாகப் பார்க்கப்படுகிறது.