தமிழக வெற்றிக் கழகத்தின் தலைவரும் நடிகருமான விஜய் நடித்துள்ள கடைசித் திரைப்படமான ‘ஜனநாயகன்’ இன்று உலகம் முழுவதும் 7,500-க்கும் மேற்பட்ட திரையரங்குகளில் மிகப்பிரம்மாண்டமாக வெளியாகியுள்ளது. சென்சார் சான்றிதழ் சிக்கல்கள் கடந்து திரைக்கு வந்துள்ள இப்படத்தை விஜய் ரசிகர்கள் மற்றும் த.வெ.க தொண்டர்கள் திருவிழா போலக் கொண்டாடி வருகின்றனர். வழக்கமாக முன்னணி நட்சத்திரங்களின் படங்களுக்கு முதல் நாள் முதல் காட்சி டிக்கெட்டுகள் அதிக விலைக்கு விற்கப்படும் நிலையில், மயிலாடுதுறையில் த.வெ.க சார்பில் பொதுமக்களுக்கு டிக்கெட்டுகள் முற்றிலும் இலவசமாக வழங்கப்பட்டு இன்ப அதிர்ச்சி அளிக்கப்பட்டுள்ளது.
மயிலாடுதுறை மாவட்டத் தமிழக வெற்றிக் கழகச் செயலாளர் கோபிநாத் தலைமையில் நடைபெற்ற இந்நிகழ்வில், நகரின் முக்கியப் பகுதிகளில் உள்ள சாலையோரச் சிறு வணிகர்கள், கூலித் தொழிலாளர்கள் மற்றும் பொதுமக்களுக்கு முதல் சிறப்பு காட்சிக்கான டிக்கெட்டுகள் நேரில் சென்று இலவசமாக விநியோகிக்கப்பட்டன. அங்குள்ள விஜயா மற்றும் கோமதி எல்.ஏ திரையரங்குகளில் படம் பார்க்க ஏற்பாடு செய்யப்பட்டிருந்த இந்த விநியோகத்தின் போது, அனைவருக்கும் இனிப்புகள் வழங்கி த.வெ.க-வினர் தங்களின் மகிழ்ச்சியைப் பகிர்ந்து கொண்டனர்.
எச். வினோத் இயக்கத்தில் கேவிஎன் புரொடக்ஷன்ஸ் தயாரிப்பில் உருவான இத்திரைப்படம் பல்வேறு தடைகளைத் தாண்டி தணிக்கைச் வாரியத்தின் ‘ஏ’ சான்றிதழுடன் திரைக்கு வந்துள்ளது. ரசிகர்களை மட்டும் குறிவைக்காமல், உழைக்கும் எளிய மக்களும் விஜய்யின் கடைசித் திரைப்படத்தைக் கண்டுகளிக்கும் வகையில் இலவச டிக்கெட் வழங்கிய மயிலாடுதுறை த.வெ.க-வினரின் இந்த மனிதநேய முயற்சி பொதுமக்களிடையே பெரும் பாராட்டையும் கவனத்தையும் பெற்றுள்ளது.