திரைப்படங்களைத் தாண்டி கார் பந்தயங்களில் அதீத ஆர்வம் காட்டி வரும் நடிகர் அஜித்குமார், தற்போது சர்வதேச அளவில் தனது ‘அஜித் குமார் ரேசிங்’ அணி மூலம் பல்வேறு போட்டிகளில் பங்கேற்று வருகிறார். இதன் ஒரு பகுதியாக, துபாயில் உள்ள புகழ்பெற்ற ‘துபாய் ஆட்டோடிரோம்’ ரேஸ் மையத்தில் அஜித் ஓட்டும் காரில் அவருடன் அமர்ந்து பயணிக்கும் அரிய வாய்ப்பு ரசிகர்களுக்கு வழங்கப்பட்டுள்ளது.
வரும் ஜனவரி 25-ஆம் தேதி நடைபெறவுள்ள இந்த சிறப்பு நிகழ்வில், அஜித்திற்கு அருகிலேயே அமர்ந்து ரேஸ் காரின் வேகத்தை அனுபவிக்க அவரது தீவிர ரசிகர்கள் ஆவலாகக் காத்திருக்கின்றனர். இந்தத் தனித்துவமான பயண அனுபவத்தைப் பெற இந்திய ரூபாய் மதிப்பில் சுமார் 86,500 ரூபாய் கட்டணமாக நிர்ணயிக்கப்பட்டுள்ளது.
சிறுவயது முதலே மோட்டார் ஸ்போர்ட்ஸில் ஆர்வம் கொண்ட அஜித்தின் ரேசிங் பயணம் குறித்த ஆவணப்படம் தயாராகி வரும் வேளையில், இந்த அறிவிப்பு ரசிகர்களுக்குப் பெரும் மகிழ்ச்சியை ஏற்படுத்தியுள்ளது. நடிகர் அஜித்துடன் நேரில் உரையாடிக்கொண்டே ரேஸ் டிராக்கில் பறக்க விரும்புபவர்கள், இந்தக் குறிப்பிட்ட தொகையைச் செலுத்தி துபாய் கார் பந்தய மையத்தில் முன்பதிவு செய்து கொள்ளலாம் எனத் தெரிவிக்கப்பட்டுள்ளது.