இந்த அதிர்ச்சியூட்டும் கொடூர சம்பவம் உத்தரபிரதேச மாநிலம் ஃபிரோசாபாத்தின் யாதவ் காலனியில் நிகழ்ந்துள்ளது. அரோன் பகுதியில் ஆசிரியராகப் பணிபுரியும் ரதி தேவி (24), தனது கணவருடன் ஏற்பட்ட கருத்து வேறுபாடு காரணமாகப் பிரிந்து, பெற்றோர் வீட்டில் வாழ்ந்து வந்துள்ளார். கடந்த சனிக்கிழமையன்று, ரதி மற்றும் அவரது தாய் பிங்கி தேவி ஆகியோர் விவாகரத்து தொடர்பான சட்ட ஆலோசனைக்காக ஷிகோஹாபாத் சென்று, அங்குள்ள தோழியின் வீட்டில் தங்கியிருந்தனர். ரதியின் கணவருக்கு உறவினரான ஜிதேந்திர பதக் (என்ற விராஜ்), இவர்களது விவாகரத்து நடவடிக்கைகளுக்கு உதவியபோது ரதியின் குடும்பத்துடன் நெருக்கமாகியுள்ளார். இந்தச் சூழலைப் பயன்படுத்தி, ரதியைத் தன்னைத் திருமணம் செய்யுமாறு விராஜ் தொடர்ந்து வற்புறுத்தி வந்த நிலையில், ரதி அதனைத் தீர்க்கமாக மறுத்துள்ளார்.
சம்பவத்தன்று, விவாகரத்தை இறுதி செய்துவிட்டு தன்னைத் திருமணம் செய்யுமாறு ஷிகோஹாபாத் வரை பின்தொடர்ந்து வந்து விராஜ் மீண்டும் அழுத்தம் கொடுத்துள்ளார். ரதியும் அவரது தாயும் மறுக்கவே, ரதியின் இரண்டு வயது மகன் ஆரவிற்கு டாஃபி (மிட்டாய்) வாங்கித் தருவதாகக் கூறி விராஜ் வெளியே அழைத்துச் சென்றுள்ளார். மதியம் 2.30 மணியளவில், வீட்டிலிருந்து 50 மீட்டர் தொலைவில் உள்ள ஆள் நடமாட்டம் இல்லாத பகுதிக்குக் குழந்தையைக் கொண்டு சென்று, தரையில் பலமுறை வீசி கொடூரமாகத் தாக்கியுள்ளார். ரதியைத் திருமணம் செய்ய அந்தக் குழந்தை தடையாக இருப்பதாகக் கருதி இந்தச் செயலில் ஈடுபட்டதாகக் கூறப்படுகிறது. குழந்தையைச் சாலையில் குறைந்தது எட்டு முறை இரக்கமின்றி தூக்கி எறியும் சிசிடிவி காட்சிகள் வெளியாகி பெரும் அதிர்ச்சியை ஏற்படுத்திய நிலையில், குழந்தையை வீட்டு வாசலில் போட்டுவிட்டு விராஜ் தப்பியோடியுள்ளார். 10 நிமிடங்களுக்குப் பிறகு குழந்தையைக் கண்டெடுத்த குடும்பத்தினர் அதிர்ச்சியடைந்தனர்; பின்னர் வந்த போலீஸார் குழந்தையின் உடலைக் கைப்பற்றி பிரேதப் பரிசோதனைக்கு அனுப்பினர்.
இக்கொடூரக் கொலை தொடர்பாக ஷிகோஹாபாத் காவல் நிலையத்தில் BNS பிரிவு 103(1)-ன் கீழ் வழக்குப் பதிவு செய்யப்பட்டு, குற்றவாளியைப் பிடிக்க நான்கு தனிப்படைகள் அமைக்கப்பட்டன. மெயின்புரி சாலை அருகே விராஜ் தப்பிக்க முயல்வதாகக் கிடைத்த ரகசியத் தகவலின் பேரில் போலீஸார் அந்தப் பகுதியைச் சுற்றி வளைத்தனர். அப்போது விராஜ் போலீஸாரை நோக்கித் துப்பாக்கிச் சூடு நடத்த, போலீஸார் நடத்திய பதில் தாக்குதலில் விராஜின் காலில் குண்டு பாய்ந்தது. காயமடைந்த குற்றவாளி விராஜ் உடனடியாகக் கைது செய்யப்பட்டு, தற்போது சிகிச்சைக்காக மாவட்ட மருத்துவமனையில் அனுமதிக்கப்பட்டுள்ளார் என்று நகர காவல் கண்காணிப்பாளர் ரவி சங்கர் பிரசாத் தெரிவித்துள்ளார்.