அமெரிக்காவின் மியாமி விமான நிலையத்திலிருந்து தம்பா நகருக்குப் புறப்படவிருந்த அமெரிக்கன் ஏர்லைன்ஸ் விமானத்தில், சக பயணிகளுக்கு இடையூறு விளைவிக்கும் வகையில் ஹெட்ஃபோன் அணியாமல் சத்தமாக வீடியோ பார்த்த பெண் ஒருவர் பாதியிலேயே இறக்கிவிடப்பட்டார்.
மேலும் விமான ஊழியர்கள் பலமுறை எச்சரித்தும், அவர் தொடர்ந்து வாக்குவாதத்தில் ஈடுபட்டதால், பாதுகாப்புப் போலீசார் வரவழைக்கப்பட்டு அவர் பலவந்தமாக வெளியேற்றப்பட்டார். தான் மிகக் குறைந்த நேரம் மட்டுமே வீடியோ பார்த்ததாக அந்தப் பெண் வாதிட்ட போதிலும், விதிமீறல் காரணமாக அவர் மீது நடவடிக்கை எடுக்கப்பட்டது.
இதனால் விமான நிறுவனங்கள் சமீபத்தில் தங்களது பயணக் கொள்கைகளை மாற்றியமைத்துள்ளன, அதன்படி சக பயணிகளுக்குத் தொந்தரவு தரும் வகையில் சத்தமாக ஆடியோ அல்லது வீடியோக்களை ஹெட்ஃபோன் இன்றி கேட்பது தடைசெய்யப்பட்டுள்ளது.
இந்த விதியை மீறிய அந்தப் பெண் விமானத்திலிருந்து வெளியேற்றப்பட்டபோது, அங்கிருந்த சக பயணிகள் அனைவரும் கைதட்டி ஆரவாரம் செய்து தங்கள் மகிழ்ச்சியை வெளிப்படுத்தினர். இந்தச் சம்பவம் தொடர்பான வீடியோ தற்போது சமூக வலைதளங்களில் வைரலாகி வருவதுடன், பொது இடங்களில் மற்றவர்களின் அமைதியைக் கெடுக்கும் செயல்களுக்கு எதிரான விழிப்புணர்வையும் ஏற்படுத்தியுள்ளது.