அமெரிக்காவுக்கு ஈரான் வைத்த ‘செக்’.. உலகமே உற்றுநோக்கும் 10 நிபந்தனைகள்… போர் நிற்குமா அல்லது தொடருமா?… அதிரும் சர்வதேச அரசியல்…!!

ஈரான் மற்றும் அமெரிக்கா இடையே நிலவி வரும் நீண்ட காலப் போர் பதற்றத்தைத் தணிக்கும் வகையில், இரண்டு வார கால தற்காலிகப் போர் நிறுத்தத்திற்கு ஈரான் பாதுகாப்பு கவுன்சில் சம்மதம் தெரிவித்துள்ளது. இதனைத் தொடர்ந்து, வரும் ஏப்ரல் 10-ம் தேதி பாகிஸ்தான் தலைநகர் இஸ்லாமாபாத்தில் இரு நாடுகளுக்கும் இடையிலான அதிகாரப்பூர்வ பேச்சுவார்த்தை தொடங்குவது உறுதி செய்யப்பட்டுள்ளது. இந்தப் பேச்சுவார்த்தை மத்திய கிழக்குப் பகுதியில் நிலவும் போர்ச் சூழலை முடிவுக்குக் கொண்டு வருவதற்கான முதல் படியாகக் கருதப்படுகிறது.இந்தப் போர் நிறுத்த உடன்படிக்கைக்கு ஈரான் தரப்பிலிருந்து பத்து மிக முக்கியமான நிபந்தனைகள் விதிக்கப்பட்டுள்ளன.

• ஈரான் மற்றும் அதன் நட்பு நாடுகள் மீது அமெரிக்கா இனி எந்தத் தாக்குதலும் நடத்தக் கூடாது.

• ஹார்முஸ் ஜலசந்தி கடல் பாதையை ஈரான் தனது ராணுவக் கட்டுப்பாட்டிலேயே வைத்திருக்கும்.

• ஈரானின் யுரேனியம் செறிவூட்டும் உரிமையைச் சர்வதேச அளவில் அங்கீகரிக்க வேண்டும்.

• அமெரிக்கா ஈரான் மீது விதித்துள்ள நேரடிப் பொருளாதாரத் தடைகள் அனைத்தையும் நீக்க வேண்டும்.

• ஈரானுடன் மற்ற நாடுகள் வணிகம் செய்வதைத் தடுக்கும் மறைமுகத் தடைகளையும் ரத்து செய்ய வேண்டும்.

• ஐநா பாதுகாப்பு கவுன்சில் ஈரானுக்கு எதிராகப் பிறப்பித்த அனைத்துத் தீர்மானங்களையும் ரத்து செய்ய வேண்டும்.

• சர்வதேச அணுசக்தி முகமை ஈரானுக்கு எதிராக வழங்கிய உத்தரவுகளைத் திரும்பப் பெற வேண்டும்.

• போரினால் ஏற்பட்ட உள்கட்டமைப்புச் சேதங்களுக்கு அமெரிக்கா ஈரானுக்கு இழப்பீடு வழங்க வேண்டும்.

• மத்திய கிழக்கில் உள்ள அனைத்துத் தளங்களிலிருந்தும் அமெரிக்கப் படைகளை முழுமையாக வெளியேற்ற வேண்டும்.

• லெபனான், ஈராக், ஏமன் ஆகிய நாடுகளில் உள்ள ஈரானின் நட்பு குழுக்கள் மீதான தாக்குதல்களை நிறுத்த வேண்டும்.

இந்தப் பத்து நிபந்தனைகளையும் உள்ளடக்கிய திட்டத்தை அமெரிக்க அதிபர் டிரம்ப், பேச்சுவார்த்தைக்கான “பரிசீலிக்க சாத்தியமான அடிப்படை” (Workable basis) என்று குறிப்பிட்டுள்ளதால், இஸ்லாமாபாத் பேச்சுவார்த்தை உலக நாடுகளின் கவனத்தை ஈர்த்துள்ளது.