இராணுவ முகாமில் படைவீரர்கள் குழுவால் நிகழ்த்தப்பட்ட கூட்டுப் பாலியல் வன்புணர்வை விவரிக்கும்போது அயர்லாந்து ஆயுதப்படையின் முன்னாள் வீராங்கனை ஒருவர் தீர்ப்பாயத்தின் முன் கண்ணீர்விட்டு அழுதுள்ளார். 90-களில் ரிசர்வ் பாதுகாப்புப் படையில் சேர்ந்து, பின்னர் 2010-களின் பிற்பகுதி வரை முழுநேரப் பணியில் இருந்த இவர், தனது 19 வயதில் நள்ளிரவில் முகாமின் குடியிருப்பில் உறங்கிக் கொண்டிருந்தபோது இந்தத் கொடூரத் தாக்குதல் நடந்ததாகத் தெரிவித்துள்ளார். படுக்கையறைக்குள் நுழைந்த இரண்டு அல்லது மூன்று வீரர்கள் தன் ஆடைகளை அகற்றி கூட்டுப் பாலியல் வன்கொடுமை செய்ததாகவும், இத்தாக்குதலால் தான் கர்ப்பமடைந்ததை அறிந்து நிலைகுலைந்து போனதாகவும் அவர் கூறியுள்ளார். பின்னர் அவர் கருக்கலைப்பு செய்து கொண்டதோடு, இந்தத் தாக்குதலின் கொடிய நினைவுகள் மீண்டும் மீண்டும் வந்து தன்னை வாட்டியதாக வேதனையுடன் பதிவு செய்துள்ளார்.
தீர்ப்பாயத்தின் விதிமுறைகளின்படி குற்றம் சாட்டப்பட்டவர்களின் பெயர்கள் ரகசியமாக வைக்கப்பட்டுள்ள நிலையில், “இந்த கூட்டு பாலியல் வன்கொடுமை குறித்து வெளியில் சொன்னால் இராணுவத்திலிருந்து வெளியேற்றப்படுவாய்” என அந்த வீரர்கள் தன்னை மிரட்டியதாகப் பாதிக்கப்பட்ட பெண் சாட்சியமளித்துள்ளார். எப்போதும் இராணுவத்தில் பணியாற்ற வேண்டும் என்ற கனவோடு இருந்ததால், வேலையை இழந்துவிடுவோம் என்ற பயத்தினாலும், பழிவாங்குவார்கள் என்ற அச்சத்தினாலும், மக்கள் தன்னை நம்புவார்களா என்ற சந்தேகத்தினாலும் இத்தனை காலம் அவர் புகார் அளிக்கவில்லை. மேலும், பாதுகாப்புப் படைகளுக்குள் இது போன்ற புகார்களைக் கையாள்வதற்குப் படையின் முன்னாள் உறுப்பினர்கள் யாரும் இல்லாத, முற்றிலும் சுதந்திரமான ஒரு தனி அமைப்பு உருவாக்கப்பட வேண்டும் என்றும் அவர் தீர்ப்பாயத்திடம் வலியுறுத்தியுள்ளார்.