சத்தீஸ்கர் மாநிலம் கான்கர் மாவட்டத்தில், தன்னைத் திருமணம் செய்துகொள்ள வற்புறுத்திய காதலியை இளைஞன் ஒருவன் தனது நண்பர்களுடன் சேர்ந்து கொடூரமாகக் கொலை செய்த சம்பவம் அதிர்ச்சியை ஏற்படுத்தியுள்ளது. கடந்த நவம்பர் 16, 2025 அன்று, 22 வயதான சங்கீதா உசேந்தி என்பவரை அவரது காதலன் தினேஷ் துக்கா மற்றும் அவனது நண்பர்கள் வயல்வெளிக்கு அழைத்துச் சென்று கழுத்தை நெரித்துக் கொன்றுள்ளனர். பின்னர், கொலையை மறைக்க உடலையும் மொபைல் போனையும் புதருக்குள் வீசிவிட்டுத் தப்பிச் சென்றனர்.
சங்கீதா காணாமல் போனது குறித்துப் புகார் அளிக்கப்பட்ட நிலையில், சுமார் இரண்டு மாதங்களுக்குப் பிறகு அவரது உடல் எலும்புக்கூடாகக் கண்டெடுக்கப்பட்டது. இதுகுறித்துத் தீவிர விசாரணை நடத்திய பகஞ்சூர் போலீஸார், காதலன் தினேஷ் மற்றும் அவனது நண்பர்களைக் கைது செய்துள்ளனர். மூன்று வருடக் காதலுக்குப் பிறகு, திருமணத்திற்கு வற்புறுத்தியதற்காக ஒரு இளம்பெண் இவ்வாறு படுகொலை செய்யப்பட்டிருப்பது அப்பகுதியில் பெரும் பரபரப்பை ஏற்படுத்தியுள்ளது.