உத்தரப் பிரதேச மாநிலம் லக்னோவில் அதிர்ச்சிகரமான சம்பவம் ஒன்று வெளிச்சத்திற்கு வந்துள்ளது. தனது தந்தையின் இறுதிச் சடங்கிற்கு முன்பாக, அவரது உடலின் கட்டைவிரல் ரேகையை வெற்றுத் தாள்களில் அவரது மகனே வைத்ததாகக் கூறப்படும் சம்பவம் பெரும் பரபரப்பை ஏற்படுத்தியுள்ளது. இந்தச் செயல் தொடர்பான வீடியோ சமூக வலைதளங்களில் பரவி வைரலாகி வருகிறது.
இறந்த நபரின் சொத்துக்களைத் தவறான வழியில் தனது பெயருக்கு மாற்றிக் கொள்வதற்காகவே இந்தச் செயல் செய்யப்பட்டுள்ளதாகக் கூறப்படுகிறது. தந்தை இறந்த துயரமான சூழ்நிலையிலும், சொத்து ஆசை காரணமாக அவரது உடலைப் பயன்படுத்தி விரல் ரேகை பதிவு செய்த மகனின் செயல் பொதுமக்களிடையே கடும் அதிர்ச்சியையும் கொந்தளிப்பையும் ஏற்படுத்தியுள்ளது.
இந்த வைரல் வீடியோ இணையத்தில் பரவியதைத் தொடர்ந்து, இது குறித்து லக்னோ காவல்துறை உடனடியாக விசாரணையைத் தொடங்கியுள்ளது. சொத்து தகராறு காரணமாக நடைபெற்ற இந்த மோசடி குறித்து விரிவான விசாரணை நடத்தப்பட்டு வருவதாகவும், குற்றச்சாட்டு உறுதி செய்யப்பட்டால் சம்பந்தப்பட்ட நபர் மீது கடுமையான சட்டப்பூர்வ நடவடிக்கை எடுக்கப்படும் என்றும் காவல்துறை தெரிவித்துள்ளது.