தமிழக வெற்றிக் கழகத்தின் சேலம் மாவட்ட நிர்வாகிகள் கூட்டத்தைத் தொடர்ந்து, அக்கட்சியின் தொண்டர் ஒருவர் நடிகர் விஜய்க்கு ஆதரவாகப் பேசுகையில் கொலை மிரட்டல் விடுத்திருப்பது அரசியல் வட்டாரத்தில் பெரும் பரபரப்பை ஏற்படுத்தியுள்ளது. இந்த விவகாரத்தைக் கையில் எடுத்துள்ள திமுக மாணவரணி துணைச் செயலாளர் தமிழ் கா.அமுதரசன், தனது சமூக வலைதளப் பக்கத்தில் கடும் கண்டனத்தைப் பதிவு செய்துள்ளார். “போகிற போக்கில் கொலை மிரட்டல் விடுக்கும் நபர் மீது தமிழ்நாடு காவல்துறை உடனடியாக உரிய நடவடிக்கை எடுக்க வேண்டும்” என்று அவர் வலியுறுத்தியுள்ளார்.
மேலும், அதே கூட்டத்தில் ஒரு உயிர் பலியான சம்பவத்தைச் சுட்டிக்காட்டிய அமுதரசன், இத்தகைய துயரமான நிகழ்வை மிகச் சாதாரணமாகக் கடந்து செல்லும் தவெகவினரின் போக்கைச் சாடியுள்ளார். “ஒரு உயிர் பிரிந்துள்ள நிலையில், அதைக் குறித்து எவ்வித அக்கறையுமின்றிப் பேசுபவர்களுக்குக் குறைந்தபட்ச குடிமை உணர்வோ (Civic sense) அல்லது பொது அறிவோ (Common sense) இல்லை” என்று அவர் விமர்சித்துள்ளார். தவெக நிர்வாகிகள் மற்றும் தொண்டர்களின் இத்தகைய பொறுப்பற்ற பேச்சுக்கள் சமூக அமைதிக்குப் பாதிப்பை ஏற்படுத்தும் எனவும் அவர் எச்சரித்துள்ளார்.