“ஆளுநர் மாளிகையில் நடந்த ரகசிய டீல்”… தளபதிக்கு நிம்மதி தந்த அந்த ஒரு வார்த்தை… – விஜய்க்கு ஆளுநர் கொடுத்த சீக்ரெட் பிராமிஸ்….!

தமிழகச் சட்டமன்றத் தேர்தல் முடிவுகள் வெளியாகிப் பரபரப்பான சூழல் நிலவி வரும் நிலையில், 108 இடங்களைப் பெற்றுத் தனிப்பெரும் கட்சியாக உருவெடுத்துள்ள தமிழக வெற்றிக் கழகத் தலைவர் விஜய், ஆட்சி அமைக்க உரிமை கோரி ஆளுநரைச் சந்தித்துள்ளார். இருப்பினும், பெரும்பான்மைக்குத் தேவையான 118 எம்.எல்.ஏ-க்களின் ஆதரவு கடிதத்தை சமர்ப்பித்தால் மட்டுமே அடுத்தகட்ட நடவடிக்கை எடுக்க முடியும் என்பதில் ஆளுநர் ராஜேந்திர அர்லேகர் உறுதியாக உள்ளார். ஆளுநர் மாளிகையிலிருந்து அழைப்பு வராத நிலையில், இரண்டாவது முறையாக ஆளுநரைச் சந்தித்த விஜய்க்கு, “118 பேர் ஆதரவு இருந்தால் மட்டுமே பதவியேற்பு” என்ற நிபந்தனை விதிக்கப்பட்டுள்ளது.

ஆளுநரின் இந்த நிபந்தனை அரசியல் வட்டாரத்தில் பெரும் விவாதத்தைக் கிளப்பியுள்ளது. சட்டசபையில் நிரூபிக்க வேண்டிய பெரும்பான்மையை ஆளுநர் மாளிகையிலேயே நிரூபிக்கச் சொல்வது முறையல்ல எனப் பிற அரசியல் கட்சிகள் எதிர்ப்பு தெரிவித்து வருகின்றன. இதற்கிடையே, விஜய்க்கு ஒரு முக்கிய வாக்குறுதியை ஆளுநர் அளித்துள்ளதாகத் தகவல்கள் வெளியாகியுள்ளன. தவெக பெரும்பான்மையை நிரூபிக்கத் தவறினால், எதிர்க்கட்சியான அதிமுக உள்ளிட்ட வேறு எந்தக் கட்சியையும் ஆட்சி அமைக்க அழைக்கப் போவதில்லை என்பதே அந்த ரகசியத் தகவல். இது விஜய்க்குச் சற்று நிம்மதியைத் தந்தாலும், எடப்பாடி பழனிசாமி ஆளுநரைச் சந்திக்க நேரம் கேட்டுள்ளது இந்த விவகாரத்தில் கூடுதல் திருப்பத்தை ஏற்படுத்தியுள்ளது.

தற்போதைய நிலவரப்படி, விஜய் இரண்டு தொகுதிகளில் வென்றுள்ளதால் ஒரு தொகுதியை ராஜினாமா செய்யும் பட்சத்தில் தவெகவின் பலம் 107 ஆகக் குறையும். காங்கிரஸ் கட்சியின் 5 எம்.எல்.ஏ-க்கள் ஆதரவு அளித்தாலும், விஜய்க்கு மேலும் 6 எம்.எல்.ஏ-க்களின் ஆதரவு தேவைப்படுகிறது. திருமாவளவன் மற்றும் கம்யூனிஸ்ட் கட்சிகள் விஜய்க்கு ஆதரவாகப் பேசி வருவது அரசியல் மாற்றங்களுக்கான அறிகுறியாகப் பார்க்கப்படுகிறது. எனினும், குறிப்பிட்ட எண்ணிக்கையிலான ஆதரவைத் திரட்ட விஜய் எடுக்கும் முயற்சிகள் “குதிரை பேரத்திற்கு” வழிவகுக்குமோ என்ற விமர்சனங்களும் ஒருபுறம் முன்வைக்கப்படுகின்றன.

தமிழகச் சட்டமன்றத்தின் பதவிக்காலம் மே 9-ம் தேதியுடன் முடிவடைய உள்ள நிலையில், அடுத்த 48 மணி நேரம் தமிழக அரசியலில் மிக முக்கியமானது. அதற்குள் நிலையான அரசு அமையாவிட்டால், தமிழகம் குடியரசுத் தலைவர் ஆட்சியை நோக்கித் தள்ளப்படும் அபாயம் உள்ளது. ஆளுநரின் நிபந்தனைகள் மற்றும் பிற கட்சிகளின் ஆதரவு நிலைப்பாடுகள் என அனைத்தும் ஒரு புள்ளியில் இணையுமா அல்லது தமிழக அரசியல் களம் புதியதொரு நிர்வாகச் சிக்கலைச் சந்திக்குமா என்பது இன்னும் ஓரிரு நாட்களில் தெரிந்துவிடும். கோட்டைக்கான இந்த பலப்பரீட்சையில் விஜய்யின் வியூகம் வெற்றி பெறுமா என்பதே இப்போது அனைவரின் எதிர்பார்ப்பும் ஆகும்.