“காலையில உயிரோட இருப்போமா” அந்த பயத்திலேயே தூங்க போறோம்… எங்களை காப்பாத்துங்க… ஈரானில் சிக்கிய தமிழக மீனவர்கள் அரசுக்கு கண்ணீர் கோரிக்கை..!!

ஈரானில் நிலவி வரும் தீவிரமான போர்ப் பதற்றங்களுக்கு இடையே, அங்கு மீன்பிடித் தொழிலுக்காகச் சென்ற கன்னியாகுமரி மாவட்டத்தைச் சேர்ந்த மீனவர்கள் நடுக்கடலில் சிக்கித் தவித்து வருகின்றனர். ஏவுகணைத் தாக்குதல்கள் தொடர்ந்து நடைபெற்று வரும் சூழலில், தங்கள் உயிருக்கு எவ்விதப் பாதுகாப்பும் இல்லாத நிலை ஏற்பட்டுள்ளதாக அந்த மீனவர்கள் வீடியோ ஆதாரங்களை வெளியிட்டுள்ளனர். தங்களை உடனடியாக மீட்க இந்திய அரசு நடவடிக்கை எடுக்க வேண்டும் என்று அவர்கள் கோரிக்கை விடுத்துள்ளனர்.

இந்த விவகாரத்தில் தலையிடக் கோரி மீனவர்களின் குடும்பத்தினர் கன்னியாகுமரி மாவட்ட ஆட்சியரிடம் மனு அளித்துள்ளனர். கன்னியாகுமரி நாடாளுமன்ற உறுப்பினர் விஜய் வசந்த் முன்னிலையில் அளிக்கப்பட்ட இந்த மனுவில், வெளியுறவுத் துறை அமைச்சகம் மற்றும் ஈரானில் உள்ள இந்தியத் தூதரகம் மூலமாக மீனவர்களைப் பாதுகாப்பாகத் தாயகம் அழைத்து வர வேண்டும் என்று வலியுறுத்தப்பட்டுள்ளது. வளைகுடா பிராந்தியத்தில் போர் பதற்றம் அதிகரித்துள்ளதால், மீனவர்களின் பாதுகாப்பு குறித்து அவர்களது குடும்பத்தினர் கவலையில் ஆழ்ந்துள்ளனர்.