தமிழகத்தில் 2026-ஆம் ஆண்டு நடைபெறவுள்ள சட்டப்பேரவை தேர்தலுக்கான ஆயத்தப் பணிகளை இந்திய தேர்தல் ஆணையம் (ECI) தீவிரப்படுத்தியுள்ளது. மார்ச் மாதத்தின் முதல் அல்லது இரண்டாவது வாரத்தில் தேர்தல் தேதிகள் அறிவிக்கப்படலாம் என்ற எதிர்பார்ப்பு நிலவும் சூழலில், வரும் பிப்ரவரி 4 மற்றும் 5-ஆம் தேதிகளில் டெல்லியில் முக்கிய ஆலோசனைக் கூட்டத்தை நடத்த தேர்தல் ஆணையம் திட்டமிட்டுள்ளது. தமிழ்நாடு, கேரளா, மேற்கு வங்கம், அசாம் மற்றும் புதுச்சேரி ஆகிய ஐந்து மாநிலங்களின் தேர்தல் முன்னேற்பாடுகள் குறித்து இந்தக் கூட்டத்தில் விரிவாக விவாதிக்கப்பட உள்ளது.
இந்த உயர்மட்ட ஆலோசனையில் பங்கேற்குமாறு தேர்தல் பார்வையாளர்களாக நியமிக்கப்படவுள்ள IAS மற்றும் IPS அதிகாரிகள், அந்தந்த மாநிலங்களின் உள்துறைச் செயலாளர்களுக்கு தேர்தல் ஆணையம் முறைப்படி அழைப்பு விடுத்துள்ளது. தேர்தல் பாதுகாப்பு, வாக்குச்சாவடி மேலாண்மை மற்றும் தேர்தல் நடத்தை விதிகளை அமல்படுத்துவது குறித்து இந்த அதிகாரிகள் ஆலோசிப்பார்கள். இந்தத் தொடர் நடவடிக்கைகள் தமிழக அரசியல் களத்தில் பெரும் பரபரப்பை ஏற்படுத்தியுள்ளதோடு, தேர்தல் களம் தற்போதே சூடுபிடிக்கத் தொடங்கியுள்ளதைக் காட்டுகிறது.