“நான் வீட்ல இருப்பேன்.. இல்ல ஆபிஸ்ல இருப்பேன்”… விஜய் ஸ்டைலிலேயே பதிலடி கொடுத்த ஜூலி…. பனையூருக்கே வரவா என ஓபன் சேலஞ்ச்….!

தமிழக வெற்றிக் கழகத் தலைவர் விஜய், அண்மையில் வேலூரில் நடைபெற்ற கட்சி நிர்வாகிகள் கூட்டத்தில் ஜல்லிக்கட்டு காளையை அரசியலோடு ஒப்பிட்டு ஒரு குட்டிக்கதை கூறினார். ஒரு ஆக்ரோஷமான காளையைச் சிறுவன் ஒருவன் புல்லுக்கட்டு காட்டி அடக்கியது போல, தவெகவும் தமிழக அரசியல் களத்தில் மாற்றத்தை ஏற்படுத்தும் என்று அவர் பேசியிருந்தார். விஜய்யின் இந்த கருத்துக்கு, ஜல்லிக்கட்டு போராட்டத்தின் மூலம் புகழ்பெற்ற ஜூலி கடும் விமர்சனங்களை முன்வைத்து ஒரு வீடியோவை வெளியிட்டார்.

ஜூலியின் இந்த விமர்சனத்தால் அதிருப்தியடைந்த விஜய் ரசிகர்கள் மற்றும் தவெக தொண்டர்கள், சமூக வலைதளங்களில் அவரை கடுமையாகத் தாக்கி கருத்துகளைப் பதிவிட்டு வருகின்றனர். பலர் ஆபாசமாகவும், மிரட்டும் தொனியிலும் கமெண்ட் செய்ததாகக் கூறப்படுகிறது. இதனால் ஆவேசமடைந்த ஜூலி, தற்போது மீண்டும் ஒரு வீடியோவை வெளியிட்டு ரசிகர்களுக்குப் பதிலடி கொடுத்துள்ளார். அதில், தான் எதற்கும் பயந்து தனது கருத்துகளைத் திரும்பப் பெறப்போவதில்லை என்றும், வீடியோவை நீக்கப்போவதில்லை என்றும் உறுதியாகத் தெரிவித்துள்ளார்.

குறிப்பாக அந்த வீடியோவில், கரூர் சம்பவத்தின் போது முதல்வர் ஸ்டாலினை நோக்கி விஜய் பேசிய அதே பாணியில் ஜூலி பேசியது பெரும் பரபரப்பை ஏற்படுத்தியுள்ளது. “விஜய் அண்ணா, உங்களுக்கு என் மீது பழிவாங்க வேண்டும் என்ற எண்ணம் இருந்தால், நான் வீட்டிலோ அல்லது அலுவலகத்திலோதான் இருப்பேன். என்னை என்ன வேண்டுமானாலும் செய்து கொள்ளுங்கள், ஆனால் என்னைச் சார்ந்தவர்களைத் தொந்தரவு செய்யாதீர்கள்” என்று விஜய் ஸ்டைலிலேயே சவால் விட்டுள்ளார். மேலும், தான் இன்னும் உயிரோடுதான் இருப்பதாகவும், தேவையென்றால் பனையூருக்கே வருவதாகவும் அவர் ஆவேசமாகக் குறிப்பிட்டுள்ளார்.

சமூக வலைதளங்களில் ஒரு பெண்ணுக்குக் கொடுக்கப்படும் மரியாதை இதுதானா என கேள்வி எழுப்பியுள்ள ஜூலி, போலி கணக்குகளை வைத்துக்கொண்டு தன்னை மிரட்டுபவர்களுக்கு அஞ்சமாட்டேன் என்று கூறியுள்ளார். அரசியல் களத்தில் விஜய்யின் பேச்சு விவாதங்களைக் கிளப்பியுள்ள நிலையில், அதற்குப் போட்டியாக ஜூலி வெளியிட்டுள்ள இந்த ‘விஜய் ஸ்டைல்’ வீடியோ இணையத்தில் காட்டுத்தீயாய் பரவி வருகிறது. இந்த மோதல் தவெக ஆதரவாளர்களுக்கும் ஜூலிக்கும் இடையேயான கருத்து மோதலை மேலும் தீவிரப்படுத்தியுள்ளது.