ஐபிஎல் 2026 தொடரின் குவாலிஃபையர் 2 போட்டியில் குஜராத் டைட்டன்ஸ் அணியிடம் ராஜஸ்தான் ராயல்ஸ் அணி படுதோல்வி அடைந்து தொடரிலிருந்து வெளியேறியது. இந்தத் தோல்வியைத் தாங்க முடியாமல், ராஜஸ்தான் அணியின் 15 வயதான இளம் அதிரடி பேட்டிங் நட்சத்திரம் வைபவ் சூர்யவன்ஷி மைதானத்திலேயே கண்கலங்கினார். இறுதிப்போட்டிக்கு முன்னேறும் ராஜஸ்தான் அணியின் கனவு உடைந்ததால் ஏற்பட்ட இந்த உணர்ச்சிகரமான தருணம் கேமராவில் பதிவாகி, சமூக வலைதளங்களில் வைரலாகி வருகிறது.
இப்போட்டியில் முதலில் பேட்டிங் செய்த ராஜஸ்தான் ராயல்ஸ் அணிக்கு வைபவ் சூர்யவன்ஷி தனது அசாத்திய திறமையால் பெரும் நம்பிக்கையை அளித்தார். தனது வயதை மீறிய முதிர்ச்சியுடன் விளையாடிய இந்த இளம் இடதுகை பேட்ஸ்மேன், 96 ரன்கள் குவித்து மிக முக்கியமான போட்டியில் சதம் அடிக்கும் வாய்ப்பை நூலிழையில் தவறவிட்டார். இவரது பயமற்ற ஆட்டத்தால் ராஜஸ்தான் அணி ஆரம்பக்கட்ட சரிவிலிருந்து மீண்டு, 214 ரன்கள் என்ற சவாலான இலக்கை நிர்ணயித்தது. இருப்பினும், இவரின் சிறப்பான பங்களிப்பையும் மீறி ராஜஸ்தான் அணியால் இந்த இலக்கைப் பாதுகாக்க முடியாமல் போனது.
குஜராத் டைட்டன்ஸ் அணியின் தொடக்க ஆட்டக்காரர்களான சுப்மன் கில் மற்றும் சாய் சுதர்சன் ஆகியோர் ராஜஸ்தான் அணியின் பந்துவீச்சைத் தும்சம் செய்து அதிரடியான பார்ட்னர்ஷிப் அமைத்தனர். கேப்டன் சுப்மன் கில்லின் அதிரடி சதம் மற்றும் சாய் சுதர்சனின் சிறப்பான ஆதரவோடு குஜராத் அணி இந்த இலக்கை எளிதாக எட்டி இறுதிப்போட்டிக்குள் நுழைந்தது. இறுதிப் போட்டிக்கு ஒரு படி தூரத்தில் தோல்வியடைந்த சோகத்தில் சூர்யவன்ஷி அழுத வீடியோவை பார்த்த ரசிகர்கள், அணியின் மீதான அவரது அர்ப்பணிப்பையும் ஆர்வத்தையும் பாராட்டி, அவருக்கு சமூக வலைதளங்களில் தங்களது ஆதரவையும் ஆறுதலையும் தெரிவித்து வருகின்றனர்.