தமிழக அரசியல் களத்தில் “லஞ்சமே இல்லாத நேர்மையான ஆட்சியைத் தருவோம்” என்ற முழக்கங்கள், தமிழக வெற்றிக் கழகம் போன்ற புதிய அரசியல் சக்திகளால் தற்பொழுது தீவிரமாக முன்வைக்கப்பட்டு வருகின்றன. அரசியல் மேடைகளில் லஞ்ச ஒழிப்பு முழக்கங்கள் காதைக் கிழிக்கும் அளவிற்கு ஒலித்துக் கொண்டிருந்தாலும், கள யதார்த்தம் முற்றிலும் வேறாகவே இருக்கிறது. அரசு ஊழியர்களின் லஞ்ச ஆசை இன்னும் குறைந்தபாடில்லை என்பதை நிரூபிக்கும் வகையில், சாமானிய மக்கள் தங்களின் அடிப்படைத் தேவைகளுக்காக அரசு அலுவலகப் படிகளில் ஏறி இறங்கி, இறுதியில் அதிகாரிகளின் பேராசைக்கு இரையாகும் அவலம் தொடர்ந்து கொண்டே இருக்கிறது.
சமீபத்தில் தமிழகம் மற்றும் புதுச்சேரியில் அடுத்தடுத்து நடந்த 3 லஞ்ச ஒழிப்பு வேட்டைகள், எளிய மக்கள் அன்றாடம் சந்திக்கும் இன்னல்களை மீண்டும் வெளிச்சம் போட்டுக் காட்டியுள்ளன. ஒரு சாமானிய மனிதன் தன் வாழ்நாள் முழுவதும் கஷ்டப்பட்டு சம்பாதித்த பணத்தில் ஒரு துண்டு நிலம் வாங்கும்போதோ, அல்லது தன் குடும்பத்திற்கான முக்கிய சான்றிதழைப் பெற முயலும்போதோ, அதிகாரிகள் லஞ்சம் கேட்டுப் பேரம் பேசுவது அவர்களின் வயிற்றில் அடிப்பது போல் உள்ளது. நிலத்தை அளக்க, பட்டாவில் பெயர் திருத்தம் செய்ய, வாரிசு சான்றிதழ் வாங்க என அரசு அலுவலகங்களை நாடிய ஏழை விவசாயிகளிடமும் பெண்களிடமும் ஆயிரக்கணக்கில் லஞ்சம் வாங்கிய 4 அரசு அதிகாரிகள் ஒரே நாளில் கையும் களவுமாக சிக்கியுள்ளனர்.
முதலாவது அதிரடி சம்பவம் திண்டுக்கல் மாவட்டத்தில் அரங்கேறியுள்ளது. குஜிலியம்பாறை அருகே உள்ள விவசாயி பொன்னர், தன் நிலத்தை அளந்து பட்டா பெற விண்ணப்பித்தபோது, பெண் சர்வேயரான மீனாம்பிகை 15,000 ரூபாய் லஞ்சம் கேட்டுள்ளார். பணத்தைக் கொடுக்க வழியில்லாத பொன்னர் லஞ்ச ஒழிப்பு போலீசாரை நாட, அவர்களின் ஆலோசனையின்படி முதற்கட்டமாக 10,000 ரூபாய் கொடுத்தபோது மீனாம்பிகை கையும் களவுமாக கைது செய்யப்பட்டார். இதேபோல நத்தம் பகுதியைச் சேர்ந்த விவசாயி அழகுவேல் என்பவரிடம் பட்டா பெயர் மாற்ற ஆன்லைனில் விண்ணப்பித்ததற்கு 8,000 ரூபாய் லஞ்சம் கேட்டு, இறுதியில் 5,000 ரூபாய் வாங்கிய சர்வேயர் முகமது இப்ராகிம் ஷெரிப் என்பவரையும் லஞ்ச ஒழிப்பு போலீசார் சுற்றி வளைத்து கைது செய்தனர். சொந்த மண்ணை அளக்கவே ஏழை விவசாயிகள் லஞ்சம் தர வேண்டிய அவலம் இங்கு தொடர்கிறது.
இந்த பரபரப்பு அடங்குவதற்குள் தேனி மாவட்டம் கம்பத்தில் இன்னொரு லஞ்ச நாடகம் அம்பலமானது. சின்ன ஓவுலாபுரத்தைச் சேர்ந்த கனகராஜ் என்பவரது உறவினரின் நிலப் பட்டாவில், அரசு ஊழியரின் அலட்சியத்தால் “லோகமணி” என்பதற்குப் பதிலாக “லோகராணி” என பெயர் தவறாகப் பதிவாகியிருந்தது. இந்த சிறு பிழையைத் திருத்த கம்பம் கிராம நிர்வாக அதிகாரி (VAO) கார்த்தியை அணுகியபோது, அவர் 5,000 ரூபாய் லஞ்சம் கேட்டுள்ளார். லஞ்சம் கொடுக்க மறுத்த கனகராஜ் தேனி லஞ்ச ஒழிப்பு போலீசில் புகார் அளித்தார். அதன்பின், போலீசாரின் திட்டப்படி ரசாயனம் தடவிய 5,000 ரூபாய் பணத்தை கார்த்தி பெற்றபோது, மின்னல் வேகத்தில் பாய்ந்த போலீசார் அவரை கையும் களவுமாகப் பிடித்து சிறையில் அடைத்தனர்.
அடுத்த அதிர்ச்சிச் சம்பவம் அண்டை மாநிலமான புதுச்சேரி வில்லியனூர் தாலுகா அலுவலகத்தில் நடந்துள்ளது. அங்கு கிராம நிர்வாக அதிகாரியாகப் பணிபுரிந்து வரும் முருகையன் என்பவரிடம், பெண் ஒருவர் தன் குடும்ப வாழ்வாதாரத்திற்காக வாரிசு சான்றிதழ் கேட்டு முறைப்படி விண்ணப்பித்திருந்தார். அனைத்து ஆவணங்களும் சரியாக இருந்தும், சான்றிதழ் வழங்க 3,000 ரூபாய் லஞ்சம் வேண்டும் என முருகையன் நிபந்தனை விதித்து அப்பெண்ணை அலைக்கழித்துள்ளார். மனமுடைந்த அப்பெண் புதுச்சேரி லஞ்ச ஒழிப்பு போலீசாரிடம் தஞ்சம் புகுந்தார். அவர்களின் வழிகாட்டுதலின்படி ரசாயனப் பவுடர் தடவிய பணத்தை வில்லியனூர் அலுவலகத்திலேயே வைத்து முருகையன் வாங்கிய அடுத்த நொடியே, போலீசார் அவரைச் சுற்றி வளைத்துக் கைது செய்தனர். ஏழை விவசாயிகளையும் பெண்களையும் அலைக்கழிக்கும் இந்த ‘சிஸ்டம்’ நிஜமாகவே எப்போது மாறும் என்பதே ஒட்டுமொத்த சாமானியர்களின் கேள்வியாக உள்ளது.