குஜராத் மாநிலம் சூரத் நகரில், திருமணமாகி வெறும் மூன்று மாதங்களே ஆன இளம் பெண் ஒருவர் தனது கணவர் மீது சுமத்தியுள்ள குற்றச்சாட்டு சமூக வலைதளங்களில் பெரும் அதிர்வலைகளை ஏற்படுத்தியுள்ளது. பொருளாதார நிலையை மேம்படுத்தவும், புதிய மனிதர்களின் அறிமுகம் மற்றும் வாழ்க்கையில் கூடுதல் மகிழ்ச்சியைப் பெறவும் கூறி, தனது கணவர் தன்னை ‘மனைவி பரிமாற்றம்’ செய்ய வற்புறுத்தியதாக அந்தப் பெண் வீடியோ ஒன்றின் மூலம் பரபரப்பு புகாரை முன்வைத்துள்ளார். கணவனின் இந்த விபரீத கோரிக்கைக்கு தான் உடன்பட மறுத்ததால், தனக்கு கடுமையான உடல் ரீதியான மற்றும் மன ரீதியான சித்திரவதைகள் அளிக்கப்பட்டதாகவும், பல்வேறு அச்சுறுத்தல்களுக்கு ஆளானதாகவும் அவர் வேதனையுடன் தெரிவித்துள்ளார். தற்போது உயிருக்கு அஞ்சி, அவர் அதிகாரிகளிடம் பாதுகாப்பு கோரி முறையிட்டுள்ளார்.
சமூக வலைதளங்களில் போலி பெயர்களில் குழுக்களைத் தொடங்கி, தம்பதியரின் புகைப்படங்களைப் பகிர்ந்து இத்தகைய சட்டவிரோத செயல்களில் பலரை இந்த கும்பல் ஈடுபடுத்தி வருவதாக பாதிக்கப்பட்ட பெண் குற்றம் சாட்டியுள்ளார். இந்த அதிர்ச்சி தரும் வலைப்பின்னலில் சமூகத்தின் உயர்மட்ட பணக்காரர்கள் மட்டுமின்றி, ஏராளமான நடுத்தர வர்க்கத்தைச் சேர்ந்த தம்பதிகளும் உறுப்பினர்களாக இருப்பதாக அவர் குறிப்பிட்டுள்ளார். மேலும், கணவன்மார்களின் இத்தகைய வற்புறுத்தல்களுக்கு இணங்க மறுக்கும் பெண்கள், தங்களைப் போன்றே கடுமையான துன்புறுத்தல்களுக்கு ஆளாக்கப்படுவதாகவும் அவர் தனது வீடியோவில் கண்ணீருடன் விவரித்துள்ளார். இந்த சட்டவிரோத செயல்களுக்கு ஆதாரமாக பல சாட் பதிவுகள் மற்றும் பிற முக்கிய ஆவணங்கள் தன்னிடம் உள்ளதாக அவர் உறுதியளித்துள்ளார்.
இந்த விவகாரத்தின் தீவிரத்தன்மையைக் கருத்தில் கொண்டு, குஜராத் மாநில உள்துறை அமைச்சர் ஹர்ஷ் சங்கவி உடனடியாக இதில் தலையிட்டு சம்பந்தப்பட்டவர்கள் மீது கடுமையான நடவடிக்கை எடுக்க வேண்டும் என அந்தப் பெண் கோரிக்கை விடுத்துள்ளார். பெண்ணின் இந்த வீடியோ சமூகத்தில் தார்மீக ரீதியாகவும், சட்டம் ஒழுங்கு ரீதியாகவும் பெரும் விவாதத்தை கிளப்பியுள்ளது. இதற்கிடையில், இந்த விவகாரம் தற்போது காவல்துறை மற்றும் நீதிமன்றத்தின் கவனத்திற்கு கொண்டு செல்லப்பட்டுள்ளது. பெண்ணின் குற்றச்சாட்டுகளின் உண்மைத் தன்மை குறித்தும், இதன் பின்னணியில் உள்ள குழுக்கள் குறித்தும் அதிகாரிகள் தீவிரமாக விசாரணை நடத்தி வருகின்றனர்.