தமிழகத் திரையுலகில் முன்னணி இயக்குநராகவும் நடிகராகவும் முத்திரை பதித்த சுந்தர்.சி, தற்போது அதிகாரப்பூர்வமாகத் தனது அரசியல் பயணத்தைத் தொடங்கியுள்ளார். 2026 தமிழக சட்டமன்றத் தேர்தலில், அதிமுக தலைமையிலான தேசிய ஜனநாயகக் கூட்டணியில் இடம்பெற்றுள்ள புதிய நீதிக் கட்சி சார்பில் அவர் வேட்பாளராகக் களம் இறங்குகிறார். மதுரை மத்திய தொகுதியில் போட்டியிடும் அவருக்கு அதிமுகவின் அதிகாரப்பூர்வச் சின்னமான இரட்டை இலை ஒதுக்கப்பட்டுள்ளது. இத்தகவலைப் புதிய நீதிக் கட்சியின் நிறுவனர் ஏ.சி.சண்முகம் அறிக்கையின் வாயிலாக உறுதிப்படுத்தியுள்ளார்.
வரவிருக்கும் ஏப்ரல் 23 சட்டமன்றத் தேர்தலுக்காக அதிமுக கூட்டணியில் பாஜகவுக்கு 27 இடங்கள் ஒதுக்கப்பட்டுள்ளன. இதில் பாஜகவின் உள் ஒதுக்கீடாகப் புதிய நீதிக் கட்சிக்கு 2 இடங்கள் வழங்கப்பட்டுள்ளன. அதில் ஒரு தொகுதியான மதுரை மத்திய தொகுதியில் சுந்தர்.சி போட்டியிடுகிறார். இதனைத் தொடர்ந்து, மார்ச் 30-ஆம் தேதி சென்னையில் நடைபெறவுள்ள செய்தியாளர் சந்திப்பில் கட்சியின் இரண்டாவது வேட்பாளர் குறித்த விவரங்களை ஏ.சி.சண்முகம் முறைப்படி அறிவிக்க உள்ளார்.
சுந்தர்.சி-யின் இந்த அரசியல் பிரவேசத்திற்கு அவரது மனைவியும் நடிகையுமான குஷ்பு நெகிழ்ச்சியுடன் வாழ்த்து தெரிவித்துள்ளார். இது குறித்து அவர் வெளியிட்டுள்ள சமூக வலைதளப் பதிவில், “தனது தந்தை சிதம்பரம் பிள்ளை மற்றும் 94 வயது தாய் தெய்வானை அம்மா ஆகியோரின் ஆசியுடன் அவர் அரசியலுக்கு வருகிறார். கடந்த 30 ஆண்டுகளாகத் திரையுலகில் மக்களை மகிழ்வித்த அவர், இப்போது மக்களுக்குப் பணியாற்றும் புதிய பயணத்தைத் தொடங்கியுள்ளார்” எனக் குறிப்பிட்டு மதுரை மக்களின் ஆதரவைக் கோரியுள்ளார்.
சினிமாத் துறையிலிருந்து பல நட்சத்திரங்கள் அரசியலில் ஜொலித்துள்ள நிலையில், “மதுரை மக்களே அவர் வருகிறார்” என்ற குஷ்புவின் அழைப்பு அரசியல் வட்டாரத்தில் பெரும் எதிர்பார்ப்பை ஏற்படுத்தியுள்ளது. மதுரை மத்திய தொகுதியில் சுந்தர்.சி-யின் வருகை அந்தத் தொகுதியின் தேர்தல் களத்தைச் சூடுபிடிக்க வைத்துள்ளது. திரைத்துறையில் வெற்றிப் படைப்புகளை வழங்கியது போல, அரசியல் களத்திலும் அவர் வெற்றி பெறுவாரா என்பதைப் பொறுத்திருந்துதான் பார்க்க வேண்டும்.