கர்நாடக மாநிலம் மைசூருவில் உள்ள ஹினகல் பகுதியில் இயங்கி வரும் ரிலையன்ஸ் மார்ட்டில் டாடா நிறுவனப் தயாரிப்புகளின் விளம்பரதாரராக நாகேஸ்வரி என்ற பெண் பி.பி.எம்.எஸ் (PPMS) முகமை மூலம் பணியாற்றி வந்தார். மேலதிகாரிகளின் கடுமையான மன உளைச்சல் மற்றும் பணிச்சூழல் நெருக்கடி காரணமாக இவர் விஷம் அருந்தி தற்கொலை செய்துகொண்ட சம்பவம் பெரும் அதிர்ச்சியை ஏற்படுத்தியுள்ளது. கடந்த நான்கு மாதங்களாக வார விடுமுறை எதுவுமின்றி உழைக்க வைக்கப்பட்டதாகவும், அவசர தேவைகளுக்குக் கூட விடுப்பு மறுக்கப்பட்டதாகவும் அவரது குடும்பத்தினர் தெரிவிக்கின்றனர்.
தற்கொலைக்கு முன்பாக நாகேஸ்வரி எழுதிய கடிதத்தில், தனது தவறு இல்லாத விஷயங்களுக்கும் மேலதிகாரிகள் தன்னை இலக்கு வைத்து மனரீதியாகத் துன்புறுத்தியதாகக் குறிப்பிட்டுள்ளார். அத்துடன், இந்த அநீதிகளைத் தட்டிக்கேட்டதற்காக அவர் பணியிலிருந்தும் நீக்கப்பட்டுள்ளார். டோலி என்ற மேற்பார்வையாளர் உட்படத் தன்னைத் துன்புறுத்தியவர்களின் பெயர்களைக் குறிப்பிட்டுள்ள அவர், பணிநீக்கமும் மன உளைச்சலுமே தனது முடிவுக்குக் காரணம் எனக் கூறியுள்ளார். இது குறித்து வழக்குப் பதிவு செய்துள்ள காவல்துறையினர் விசாரணை நடத்தி வரும் நிலையில், தன் மகளின் உயிரிழப்பிற்குக் காரணமானவர்கள் மீது கடும் நடவடிக்கை எடுத்து நீதி வழங்க வேண்டும் என அவரது தாய் ரத்னம்மா உருக்கமாகக் கோரிக்கை விடுத்துள்ளார்.