கடலூர் தொகுதி தமிழக வெற்றிக் கழக (தவெக) வேட்பாளர் ராஜ்குமாரின் உறவினர் புகழேந்திக்கு சொந்தமான பேக்கரி மற்றும் வீடுகளில், வருமான வரித்துறையினர் மற்றும் தேர்தல் பறக்கும் படையினர் இணைந்து அதிரடி சோதனை நடத்தினர். பணப்பட்டுவாடா புகாரின் அடிப்படையில் சென்னையில் இருந்து வந்த அதிகாரிகள், நேற்று முன்தினம் மாலை தொடங்கி நேற்று அதிகாலை வரை இந்தச் சோதனையை மேற்கொண்டனர். இதனால் ஆத்திரமடைந்த தவெகவினர் கட்சி அலுவலகம் மற்றும் வருமான வரித்துறை அலுவலகம் முன்பு திரண்டதால் அப்பகுதியில் பெரும் பரபரப்பு ஏற்பட்டது.
இரண்டாவது நாளாக நீடித்த இந்தச் சோதனையில், புகழேந்தியின் வீட்டிலிருந்து கணக்கில் வராத ரூ.12 லட்சம் ரொக்கம், பல லட்ச ரூபாய் மதிப்பிலான வங்கி ஆவணங்கள் மற்றும் முக்கிய கோப்புகளை அதிகாரிகள் பறிமுதல் செய்ததாகக் கூறப்படுகிறது. விசாரணையை முன்னிட்டு புகழேந்தி போலீஸ் காவலில் வைக்கப்பட்டார். இந்தச் சோதனையின் எதிரொலியாக, கடலூர் மாவட்டத்தில் நடிகர் விஜய் மேற்கொள்ளவிருந்த தேர்தல் பிரசாரம் ரத்து செய்யப்பட்டது குறிப்பிடத்தக்கது.