திமுகவுக்குப் பெரிய ஷாக்…! லேசர் பிரிண்டிங்கையும் தின்னர் ஊற்றி அழிக்கும் மாணவர்கள்…. லேப்டாப் திட்டத்தில் இப்படியொரு சிக்கலா…?

தமிழகத்தில் கல்லூரி மாணவர்களுக்கு வழங்கப்பட்ட இலவச மடிக்கணினிகளில் இடம்பெற்றுள்ள முதலமைச்சர் மற்றும் முன்னாள் முதலமைச்சரின் உருவப்படங்களை மாணவர்கள் ரசாயனங்களைப் பயன்படுத்தி அழித்து வருவது அரசியல் வட்டாரத்தில் பெரும் பரபரப்பை ஏற்படுத்தியுள்ளது.

தேர்தல் நெருங்கும் வேளையில் மீண்டும் தொடங்கப்பட்ட இத்திட்டத்தின் கீழ் வழங்கப்பட்ட லேப்டாப்களில், மு.க.ஸ்டாலின் மற்றும் கருணாநிதியின் படங்கள் லேசர் முறையில் அச்சிடப்பட்டுள்ளன. இவற்றை எளிதில் அகற்ற முடியாது என்று அரசு நினைத்த நிலையில், மாணவர்கள் பெட்ரோல் மற்றும் பெயிண்ட் தின்னர்களைப் பயன்படுத்தி அந்தப் படங்களை லாவகமாக அகற்றும் வீடியோக்கள் இணையத்தில் வேகமாகப் பரவி வருகின்றன.

முன்பு அதிமுக ஆட்சியில் வழங்கப்பட்ட மடிக்கணினிகளில் முதல்வர்களின் படங்கள் ஸ்டிக்கராக ஒட்டப்பட்டிருந்ததால் மாணவர்கள் அவற்றை எளிதாகப் பிரித்து எடுத்தனர். ஆனால் தற்போது லேசர் அச்சு முறையில் படங்கள் உள்ளதால், மாணவர்கள் தொழில்நுட்ப ரீதியாகச் சிந்தித்து அவற்றை அழித்து சமூக வலைதளங்களில் பகிர்ந்து வருகின்றனர்.

சில இடங்களில் முதலமைச்சரின் படத்திற்கு மேல் நடிகர் விஜய்யின் படங்களை ஒட்டி மாணவர்கள் கொண்டாடி வருவது திமுகவினரிடையே அதிர்ச்சியை ஏற்படுத்தியுள்ளது. மாணவர்களின் இத்தகைய செயல்பாடு தற்போதைய அரசியல் சூழலில் விவாதப் பொருளாக மாறியுள்ளது.