படித்துக் கொண்டிருந்த மாணவிக்கு நேர்ந்த கொடூரம்… நள்ளிரவில் வீட்டின் மாடிக்கே வந்து வெட்டிய கும்பல்… வெளியான திடுக்கிடும் தகவல்…!

திருவள்ளூர் மாவட்டம் மீஞ்சூர் அருகே கல்லூரி மாணவி ஒருவருக்கு நேர்ந்த கொடூரச் சம்பவம் அப்பகுதி மக்களிடையே பெரும் அதிர்ச்சியையும், அச்சத்தையும் ஏற்படுத்தியுள்ளது. வல்லூர் ஊராட்சிக்கு உட்பட்ட வாலாஜா மசூதி தெருவில் வசித்து வரும் முகமது அஸ்கர் என்பவரது மகள் சுமையா பாத்திமா (17), சென்னையில் உள்ள கல்லூரியில் முதலாம் ஆண்டு படித்து வருகிறார். நேற்று இரவு தனது அறையில் அமர்ந்து தேர்வுக்காகப் படித்துக் கொண்டிருந்தபோது, வீட்டிற்குள் புகுந்த மூன்று பேர் கொண்ட மர்ம கும்பல், அம்மாணவியை அரிவாளால் சரமாரியாக வெட்டிவிட்டுத் தப்பியோடியது.

தாக்குதலில் படுகாயமடைந்த மாணவியின் அலறல் சத்தம் கேட்டு ஓடிவந்த அக்கம் பக்கத்தினர், அவரை மீட்டு மீஞ்சூரில் உள்ள தனியார் மருத்துவமனையில் சிகிச்சைக்காக அனுமதித்தனர். தப்பியோட முயன்ற மர்ம கும்பலில் ஒருவனைப் பொதுமக்கள் மடக்கிப் பிடித்து தர்ம அடி கொடுத்து, மீஞ்சூர் காவல்துறையினரிடம் ஒப்படைத்தனர். இந்த துணிகரச் சம்பவம் மக்கள் நடமாட்டம் உள்ள பகுதியில் அரங்கேறியது அப்பகுதி வாசிகளை நிலைகுலையச் செய்துள்ளது.

இச்சம்பவம் குறித்து முதற்கட்ட விசாரணை நடத்திய காவல்துறையினர், கொள்ளையடிக்கும் நோக்கில் வந்த கும்பல் வீட்டில் மாணவியைக் கண்டதும் இந்த வெறிச்செயலில் ஈடுபட்டதாகத் தெரிவித்துள்ளனர். இருப்பினும், பிடிபட்ட நபரிடம் தீவிர விசாரணை நடைபெற்று வருகிறது. கொள்ளை முயற்சிதானா அல்லது வேறு ஏதேனும் முன்விரோதம் காரணமா என்ற கோணத்திலும் காவல்துறையினர் தீவிரமாகத் தேடுதல் வேட்டை நடத்தி வருகின்றனர்.

அப்பகுதி மக்கள் மற்றும் பாதிக்கப்பட்ட மாணவியின் உறவினர்கள் கூறுகையில், அமைதியான குடியிருப்புப் பகுதியாக இருந்த இவ்விடத்தில், சமீபகாலமாக கஞ்சா மற்றும் போதைப்பொருள் புழக்கம் அதிகரித்துள்ளதாகக் குற்றம் சாட்டுகின்றனர். இளைஞர்களிடையே பெருகி வரும் இந்த போதைப் பழக்கமே இத்தகைய கொடூரக் குற்றங்களுக்குக் காரணமாக அமைவதாகவும், பொதுமக்களின் பாதுகாப்பை உறுதி செய்யக் காவல்துறையினர் போதைப்பொருள் நடமாட்டத்தைத் தடுத்துக் கடும் நடவடிக்கை எடுக்க வேண்டும் என்றும் அவர்கள் கோரிக்கை விடுத்துள்ளனர்.