Youtube பார்த்து டயட்… 3 மாதமாக அதை மட்டுமே சாப்பிட்ட மாணவன் பரிதாப மரணம்… அதிர்ச்சி சம்பவம்…!

கன்னியாகுமரி மாவட்டம் பர்னட்டிவிளையை சேர்ந்த நாகராஜன் என்பவர் சுங்கவரி துறையில் ஏட்டாக பணியாற்றி வருகின்றார். இவருக்கு 17 வயதில் சக்தீஸ்வர் என்ற மகன் உள்ள நிலையில் பிளஸ் 2 தேர்ச்சி பெற்று இன்ஜினியரிங் கல்லூரியில் சேர தயாராகி வந்தார். இப்படியான நிலையில் மாணவர் நேற்று வீட்டில் திடீரென மூச்சு திணறி மயங்கி கீழே விழுந்து உயிரிழந்தார். இது தொடர்பாக தகவல் அறிந்து சம்பவ இடத்திற்கு வந்த போலீசார் பெற்றோரிடம் விசாரணை நடத்திய நிலையில் பல திடுக்கிடும் தகவல்கள் வெளிவந்தது. அதாவது மாணவன் உடல் பருமனால் அவதி உற்று வந்த நிலையில் தற்போது மேற்படிப்புக்காக கல்லூரிக்கு செல்ல இருந்ததால் உடல் பருமனை பார்த்து சக மாணவர்கள் கேலி கிண்டல் செய்யலாம் என்று நினைத்துள்ளார்.

இதனால் உடல் எடையை குறைக்கும் வழிமுறைகளை youtube-யில் தேடிப் பார்த்துள்ளார். அதில் கிடைத்த தகவலின் படி கடுமையான உணவு கட்டுப்பாடுகளை அவர் கடைபிடித்து வந்த நிலையில் கடந்த மூன்று மாதங்களாக திட உணவு எதுவும் சாப்பிடாமல் பழச்சாறு மட்டுமே குடித்து உடற்பயிற்சி செய்து வந்துள்ளார். தொடர்ந்து பழச்சாறு குடித்து வந்ததால் சளி தொல்லைக்கு ஆளாகி மூச்சுத் திணறல் ஏற்பட்டு மயங்கி விழுந்து மாணவன் உயிரிழந்தது தெரியவந்தது. இந்த சம்பவம் பெரும் அதிர்ச்சியையும் பரபரப்பையும் ஏற்படுத்தி உள்ளது.