பெங்களூருவில் பயங்கரம்..! 4 வயது சிறுமியை கடித்து குதறி தரதரவென இழுத்துச்செல்லும் தெருநாய்கள் – நெஞ்சை பதறவைக்கும் CCTV காட்சிகள்..!!

பெங்களூருவின் சகாகார நகர் பகுதியில், நான்கு வயது சிறுமி ஒருவரை தெருநாய்கள் கூட்டம் கொடூரமாகக் கடித்துக் குதறிய அதிர்ச்சியூட்டும் சம்பவம் அங்குள்ள சிசிடிவி கேமராவில் பதிவாகி சமூக வலைத்தளங்களில் பெரும் பரபரப்பை ஏற்படுத்தியுள்ளது. தனது வீட்டின் அருகே சிறுமி தனியாக விளையாடிக் கொண்டிருந்தபோது, அங்கு வந்த மூன்றுக்கும் மேற்பட்ட தெருநாய்கள் திடீரென அந்தப் பிஞ்சுச் சிறுமியைச் சூழ்ந்து கொண்டு கொடூரமாகத் தாக்கத் தொடங்கின.

அந்த நாய்கள் சிறுமியைத் தரதரவென இழுத்துச் சென்று கடித்ததில், அவர் நிலைகுலைந்து போனார். சிறுமியின் அலறல் சத்தத்தைக் கேட்டு, அருகில் இருந்தவர்கள் மற்றும் அக்கம்பக்கத்தினர் உடனடியாக ஓடிவந்து நாய்களைக் கல்லை வீசி விரட்டினர். இதனால் அச்சிறுமி நூலிழையில் பெரும் உயிர்ச் சேதத்திலிருந்து காப்பாற்றப்பட்டார். நாய்கள் கடித்ததில் பலத்த காயமடைந்த சிறுமி, உடனடியாக மீட்கப்பட்டு அருகில் உள்ள மருத்துவமனையில் தீவிர சிகிச்சைக்காக அனுமதிக்கப்பட்டுள்ளார்.

இந்தக் கொடூரமான சிசிடிவி காட்சிகள் இணையத்தில் பரவியதைத் தொடர்ந்து, அப்பகுதி மக்கள் மற்றும் நெட்டிசன்கள் மத்தியில் பெரும் கொந்தளிப்பு ஏற்பட்டுள்ளது. பெங்களூருவில் நாளுக்கு நாள் அதிகரித்து வரும் தெருநாய்களின் அச்சுறுத்தலைக் கட்டுப்படுத்த பிரஹத் பெங்களூரு மகாநகர பலிகே (BBMP) நிர்வாகம் முறையான நடவடிக்கை எடுக்கவில்லை எனப் பொதுமக்கள் கடுமையான குற்றச்சாட்டுகளை முன்வைத்து வருகின்றனர்.