உலகளாவிய கச்சா எண்ணெய் வர்த்தகத்தின் இதயத் துடிப்பாக விளங்கும் ஹார்முஸ் நீரிணை, தற்போது அமெரிக்க – ஈரான் இடையிலான போர் பதற்றத்தால் முடக்கப்பட்டுள்ளது. உலகின் மொத்த எண்ணெய் ஏற்றுமதியில் சுமார் 25 சதவீதத்தைக் கையாளும் இந்த முக்கியமான கடல்வழிப் பாதை பாதிக்கப்பட்டிருப்பது, உலக நாடுகளிடையே பெரும் கவலையை ஏற்படுத்தியுள்ளது. பெர்சிய வளைகுடாவையும் ஓமன் வளைகுடாவையும் இணைக்கும் இந்த குறுகிய பாதை முடங்கியுள்ளதால், எண்ணெய் விநியோகச் சங்கிலியில் பெரும் தேக்கம் ஏற்பட்டு விலை உயர்வு அபாயம் உருவாகியுள்ளது.
இந்த இக்கட்டான சூழலில், சுமார் 15 ஆண்டுகளுக்குப் பிறகு ஈராக் – சிரியா எல்லைப்பகுதி திறக்கப்பட்டிருப்பது ஒரு முக்கியத் திருப்புமுனையாகப் பார்க்கப்படுகிறது. கடந்த 2011-ம் ஆண்டு சிரிய உள்நாட்டுப் போரின் காரணமாக மூடப்பட்ட ராபியா-யருபியா (Rabia – Yarubiyah) எல்லைப் பகுதி, தற்போது மீண்டும் பயன்பாட்டிற்கு வந்துள்ளது. இரு நாட்டு அதிகாரிகளும் பங்கேற்ற திறப்பு விழாவில், இது பொருளாதார ஒத்துழைப்பின் புதிய தொடக்கம் என அறிவிக்கப்பட்டுள்ளது. கடல்வழிப் பாதைக்கு மாற்றாக ஒரு தரைவழிப் பாதையை உருவாக்க வேண்டிய கட்டாயத்தில் இந்த நடவடிக்கை எடுக்கப்பட்டுள்ளது.
புதிய திட்டத்தின்படி, ஈராக்கிலிருந்து கச்சா எண்ணெய் தரைவழியாக சிரியாவிற்கு கொண்டு செல்லப்பட்டு, அங்கிருந்து மத்திய தரைக்கடல் வழியாக உலக சந்தைகளுக்கு அனுப்பப்படும். ஈராக் அரசின் எண்ணெய் மார்கெட்டிங் அமைப்பான ‘சோமோ’ (SOMO), அடுத்த சில மாதங்களுக்கு சுமார் 6.5 மில்லியன் மெட்ரிக் டன் எரிஎண்ணெயைத் தரைவழியாகக் கொண்டு செல்ல ஏற்கனவே ஒப்பந்தங்களை மேற்கொண்டுள்ளது. இது ஹார்முஸ் நீரிணை முடக்கத்தால் ஏற்படும் தற்காலிக பாதிப்புகளைக் குறைக்க உதவும் என்று எதிர்பார்க்கப்படுகிறது.
ஈராக் நாட்டைப் பொறுத்தவரை அதன் வருவாயில் 90 சதவீதம் எண்ணெய் வர்த்தகத்தையே சார்ந்துள்ளது. எனவே, இந்த எல்லை திறப்பு அந்நாட்டின் பொருளாதார வளர்ச்சிக்கு மிகப்பெரிய ஊக்கத்தை அளிக்கும். அதே வேளையில், கச்சா எண்ணெய் இறக்குமதியை அதிகம் நம்பியுள்ள இந்தியா போன்ற வளரும் நாடுகளுக்கு, கடல்வழித் தடைகளால் ஏற்படும் தட்டுப்பாட்டைச் சமாளிக்க இந்த தரைவழிப் போக்குவரத்து ஓரளவிற்குத் துணைபுரியும். சர்வதேச சந்தையில் விலையேற்றத்தைக் கட்டுப்படுத்த இது ஒரு தற்காலிக வடிகாலாக அமையும்.
இருப்பினும், இந்த தரைவழிப் பாதை ஹார்முஸ் நீரிணைக்கு முழுமையான மாற்றாக இருக்க முடியாது என்று நிபுணர்கள் எச்சரிக்கின்றனர். பெரும் கப்பல்கள் மூலம் கொண்டு செல்லப்படும் எண்ணெயை விட, லாரிகள் அல்லது தரைவழிப் போக்குவரத்து என்பது செலவு மிக்கது மற்றும் அதிக நேரம் எடுக்கக்கூடியது. மேலும், இப்பகுதியின் பாதுகாப்புச் சூழலும் ஒரு சவாலாகவே உள்ளது. எது எப்படியிருப்பினும், உலக எண்ணெய் சந்தையில் ஒரு ‘பேக்அப்’ (Backup) வழியாக இந்த ஈராக் – சிரியா பாதை புவிசார் அரசியலில் ஒரு புதிய மாற்றத்தை விதைத்துள்ளது என்பதில் ஐயமில்லை.