2026 தேர்தல் அஸ்திரம் தயார்…. திருச்சியை திணற வைக்கும் திமுக…. ஸ்டாலின் வெளியிடப்போகும் ‘மெகா’ அறிவிப்பு….

2026 சட்டமன்றத் தேர்தலை முன்னிட்டு, தமிழக அரசியல் களம் சூடுபிடித்துள்ள சூழலில், திமுக சார்பில் திருச்சிராப்பள்ளி சிறுகனூரில் பிரம்மாண்ட மாநாடு இன்று நடைபெறவுள்ளது. “ஸ்டாலின் தொடரட்டும்… தமிழ்நாடு வெல்லட்டும்” என்ற தலைப்பில் நடைபெறும் இந்த மாநாடு, திமுகவின் தேர்தல் பணிகளுக்கு ஒரு முக்கியத் தொடக்கமாகப் பார்க்கப்படுகிறது. சுமார் 20 லட்சம் சதுர அடி பரப்பளவில் அமைக்கப்பட்டுள்ள இந்த மாநாட்டுத் திடலில், சுமார் 10 லட்சம் தொண்டர்கள் பங்கேற்பார்கள் என்று எதிர்பார்க்கப்படுகிறது.

இந்த மாநாட்டிற்காகக் கட்சி நிர்வாகிகள் சிறப்பான ஏற்பாடுகளைச் செய்துள்ளனர். மாலையில் முதல்வர் மு.க. ஸ்டாலின் மாநாட்டுத் திடலுக்கு வருகை தந்து, கட்சிக் கொடியை ஏற்றி வைத்து உரையாற்றுகிறார். முன்னதாக, கலாச்சார நிகழ்ச்சிகள் மற்றும் பிரபல இசையமைப்பாளர் தேவா உள்ளிட்டோரின் இசை நிகழ்ச்சிகளுடன் மாநாடு உற்சாகமாகத் தொடங்குகிறது. கடந்த 2021 தேர்தலுக்கு முன்பாக இதே இடத்தில் நடைபெற்ற மாநாடு திமுகவின் வெற்றிக்கு ஒரு திருப்புமுனையாக அமைந்ததைப் போலவே, இம்முறையும் இந்த மாநாடு அமையும் என அக்கட்சியினர் நம்பிக்கையுடன் உள்ளனர்.

இந்த மாநாட்டின் முக்கிய அம்சமாக, முதல்வர் மு.க. ஸ்டாலின் சில அதிரடியான புதிய அரசியல் மற்றும் நிர்வாக அறிவிப்புகளை வெளியிட வாய்ப்புள்ளதாகத் தகவல் வெளியாகியுள்ளது. குறிப்பாக, 2026 சட்டமன்றத் தேர்தலைக் கருத்தில் கொண்டு, வாக்காளர்களைக் கவரும் வகையிலான முக்கிய அறிவிப்புகள் வெளியாகக்கூடும் என்பதால், அரசியல் வட்டாரங்கள் மற்றும் எதிர்க்கட்சிகள் இந்த மாநாட்டை மிகுந்த உன்னிப்புடன் கவனித்து வருகின்றன.

திமுகவின் இந்த மாநாடு, கூட்டணி தொடர்பான பணிகளை வேகப்படுத்தவும், கட்சித் தொண்டர்களுக்குத் தேர்தல் உற்சாகத்தை ஊட்டவும் திட்டமிடப்பட்டுள்ளது. முதல்வரின் தலைமையில் திமுக சந்திக்கும் இரண்டாவது பொதுத் தேர்தல் என்பதால், இந்த மாநாட்டின் மூலம் கட்சி நிர்வாகம் தேர்தல் வியூகங்களை வலுப்படுத்த முனைப்பு காட்டி வருகிறது. மாநாட்டின் முடிவில் வெளியாகவிருக்கும் அறிவிப்புகள், தமிழகத்தின் அடுத்தகட்ட அரசியல் போக்கை நிர்ணயிக்கும் காரணியாக அமையும் என்று எதிர்பார்க்கப்படுகிறது.