“அண்ணாமலை என் தம்பி, கை வச்சு பாரு” – மும்பையில் கர்ஜித்த ராஜ் தாக்கரேவுக்கு சீமான் கொடுத்த ‘மரண மாஸ்’ பதிலடி….!

மும்பை மாநகராட்சி தேர்தல் பரப்புரையில் தமிழக பாஜகவின் முன்னாள் தலைவர் அண்ணாமலை குறித்து மகாராஷ்டிர நவநிர்மாண் சேனைத் தலைவர் ராஜ் தாக்கரே வெளியிட்ட வன்முறைப் பேச்சிற்கு நாம் தமிழர் கட்சியின் ஒருங்கிணைப்பாளர் சீமான் கடும் கண்டனம் தெரிவித்துள்ளார். அண்ணாமலை மும்பையில் கால் வைத்தால் அவரது கால்களை வெட்டுவேன் என்று ராஜ் தாக்கரே பேசியது ஜனநாயகத்திற்கு எதிரானது என்றும், கருத்தை கருத்தால் மட்டுமே எதிர்கொள்ள வேண்டும் என்றும் சீமான் வலியுறுத்தியுள்ளார். மண்ணின் மைந்தர்களுக்கான உரிமைகளுக்காகப் போராடும் மகாராஷ்டிர அமைப்புகளின் கொள்கையை தாம் மதித்தாலும், இத்தகைய வன்முறை மிரட்டல்கள் ஒருபோதும் ஏற்றுக்கொள்ள முடியாதவை என்று அவர் சுட்டிக்காட்டியுள்ளார்.

அண்ணாமலையின் அரசியல் நிலைப்பாடுகள் மற்றும் கொள்கைகளுடன் தமக்கு ஆயிரம் முரண்பாடுகள் இருந்தாலும், அவர் முதலில் தமிழ் இனத்தின் மகன் என்று சீமான் குறிப்பிட்டுள்ளார். ராஜ் தாக்கரேவின் இந்த வன்முறைப் பேச்சு அண்ணாமலை என்ற தனிநபரைக் கடந்து ஒட்டுமொத்த தமிழ் மக்களையுமே அவமதிக்கும் செயலாக அமைந்துள்ளதாக அவர் கொந்தளித்துள்ளார். அரசியல் மற்றும் கொள்கைகளைக் கடந்து அண்ணாமலைக்கு ஒரு தமிழனாக தாம் என்றும் துணையாக இருப்பேன் என்றும், தமிழர்களை அச்சுறுத்தும் இத்தகைய போக்குகளை ஒருபோதும் அனுமதிக்க முடியாது என்றும் தனது அறிக்கையில் சீமான் மிக உறுதியாகத் தெரிவித்துள்ளார்.