ஐபிஎல் 2026 தொடரில் ராஜஸ்தான் ராயல்ஸ் அணிக்காக விளையாடிய 15 வயது இளம் வீரர் வைபவ் சூர்யவன்ஷி, தனது அதிரடி ஆட்டத்தின் மூலம் பல்வேறு சாதனைகளைப் படைத்து விருதுகளை வாரிக்குவித்துள்ளார். இந்த சீசனில் 237.30 என்ற அசாத்தியமான ஸ்டிரைக் ரேட்டில் 776 ரன்கள் குவித்து அதிக ரன்கள் எடுத்த வீரராகத் திகழ்ந்த அவர், 72 சிக்ஸர்களைப் பறக்கவிட்டுப் புதிய சாதனை படைத்துள்ளார். இதன் மூலம் மிக இளம் வயதில் (15 வயது 65 நாட்கள்) ஐபிஎல் தொடரின் ‘ஆரஞ்சு தொப்பி’ (Orange Cap) வென்றவர் என்ற வரலாற்றுச் சாதனையை சூர்யவன்ஷி நிகழ்த்தியுள்ளார். இதற்கு முன்பு சாய் சுதர்சன் மற்றும் சுப்மன் கில் ஆகியோர் 23 வயதில் இந்த சாதனையைப் படைத்ததே சாதனையாக இருந்தது.
நடந்து முடிந்த இந்த ஐபிஎல் தொடரில் மட்டும் சூர்யவன்ஷி மொத்தம் 5 முக்கிய விருதுகளை வென்று அசத்தியுள்ளார். அவர் ஆரஞ்சு தொப்பியுடன் சேர்த்து, இந்த சீசனின் மோஸ்ட் வேல்யுபில் பிளேயர் (Most Valuable Player), எமர்ஜிங் பிளேயர் ஆஃப் தி சீசன் (Emerging Player), சூப்பர் ஸ்டிரைக்கர் ஆஃப் தி சீசன் (Super Striker) மற்றும் சூப்பர் சிக்சஸ் ஆஃப் தி சீசன் (Super Sixes) ஆகிய விருதுகளையும் தன்வசப்படுத்தியுள்ளார். விருதுகளை வென்ற பின் பேசிய அவர், மூத்த வீரர்கள் மற்றும் துணைப் பணியாளர்கள் தனக்கு அளிக்கும் ஆதரவு ஒரு நல்ல சூழலை உருவாக்கியுள்ளதாகவும், காயங்கள் இன்றி விளையாட தனது உடற்தகுதியில் அதிக கவனம் செலுத்தப்போவதாகவும் மகிழ்ச்சியுடன் தெரிவித்துள்ளார்.