“அம்மான்னு கூட பாக்கல!” தகாத உறவால் வெடித்த ஆத்திரம்… கஞ்சா போதையில் மகன் செய்த கொடூரம்…ஜோலார்பேட்டையில் நடந்த பயங்கரம்…!!

திருப்பத்தூர் மாவட்டம் ஜோலார்பேட்டை அருகே உள்ள கருப்பனூர் எம்.ஜி.ஆர். நகர் பகுதியைச் சேர்ந்தவர் கஸ்தூரி. இவரது கணவர் அண்ணாதுரை இருபது ஆண்டுகளுக்கு முன்பே காலமான நிலையில், இவர் பூ விற்று தனது மகன் சத்தியமூர்த்தி மற்றும் ஒரு மகளை வளர்த்து வந்துள்ளார். மகளுக்கு திருமணமாகி தருமபுரியில் வசித்து வரும் நிலையில், மகன் சென்னையில் உள்ள பானிபூரி கடை ஒன்றில் வேலை பார்த்து வந்துள்ளார். இந்நிலையில், கஸ்தூரிக்கு வேறொரு நபருடன் தொடர்பு இருப்பதை அறிந்த அவரது மகன், தாய் தனது பழக்கத்தை மாற்றிக் கொள்ள வேண்டும் என பலமுறை கண்டித்துள்ளார்.

மகனின் அறிவுரையைக் கேட்காமல் கஸ்தூரி தொடர்ந்து அந்த நபருடன் தொடர்பில் இருந்ததாகக் கூறப்படுகிறது. இதனால் கடும் ஆத்திரமடைந்த சத்தியமூர்த்தி, நேற்று சென்னையில் இருந்து தனது சொந்த ஊருக்குத் திரும்பியுள்ளார். அப்போது கஞ்சா போதையில் இருந்த அவர், தனது தாய் என்றும் பாராமல் வீட்டில் இருந்த கட்டையை எடுத்து கஸ்தூரியை கடுமையாகத் தாக்கியுள்ளார். இந்த கொடூரத் தாக்குதலில் பலத்த காயமடைந்த கஸ்தூரி சம்பவ இடத்திலேயே பரிதாபமாக உயிரிழந்தார்.

இது குறித்து அப்பகுதி மக்கள் அளித்த தகவலின் பேரில், டி.எஸ்.பி. முரளி தலைமையிலான ஜோலார்பேட்டை காவல்துறையினர் சம்பவ இடத்திற்கு விரைந்து வந்தனர். தாயைக் கொலை செய்துவிட்டு தப்பியோடாமல் வீட்டின் அருகிலேயே அமர்ந்திருந்த சத்தியமூர்த்தியை போலீசார் கைது செய்து காவல் நிலையத்திற்கு விசாரணைக்காக அழைத்துச் சென்றனர். பெற்ற தாயையே மகன் கட்டையால் அடித்துக் கொன்ற இந்த சம்பவம் அப்பகுதி மக்களிடையே பெரும் அதிர்ச்சியையும், சோகத்தையும் ஏற்படுத்தியுள்ளது.