வரதட்சணைக் கொடுமையைத் தட்டிக்கேட்ட மாமனார்.. அடித்துக் கொன்ற மருமகன்… தமிழகத்தை உலுக்கிய பகீர் சம்பவம்…!

திருவள்ளூர் அருகே உள்ள செவ்வாய்பேட்டையைச் சேர்ந்த தமிழ்ச்செல்வி என்ற பெண்ணிற்குத் திருமணம் நடந்துள்ளது. திருமணத்திற்குப் பிறகு, தமிழ்ச்செல்வியை அவருடைய கணவர் ரவீந்தர் மற்றும் மாமனார் ஆகிய இருவரும் சேர்ந்து தொடர்ந்து வரதட்சணை கேட்டுத் துன்புறுத்தி, கொடுமைப்படுத்தி வந்துள்ளனர்.

தன் மகள் வரதட்சணைக் கொடுமையால் அவதிப்படுவதைக் கண்டு கோபமடைந்த தமிழ்ச்செல்வியின் தந்தை ராஜ், மாப்பிள்ளையின் வீட்டிற்கு நேரில் சென்று இதுகுறித்து தட்டிக்கேட்டுள்ளார். அப்போது, அவருக்கும் மருமகன் ரவீந்தருக்கும் இடையே கடுமையான வாக்குவாதம் ஏற்பட்டு, அது தகராறாக மாறியுள்ளது.

இந்த வாக்குவாதத்தின் உச்சக்கட்டமாக, கோபமடைந்த மருமகன் ரவீந்தரும் அவருடைய தந்தையும் சேர்ந்து ராஜ் மீது சரமாரியாகத் தாக்குதல் நடத்தினர். இந்த பயங்கரமான தாக்குதலில் பலத்த காயமடைந்த ராஜ், சம்பவ இடத்திலேயே பரிதாபமாக உயிரிழந்தார். இக்கொலைச் சம்பவத்தையடுத்து தலைமறைவான மருமகன் ரவீந்தரை காவல்துறையினர் தீவிரமாகத் தேடி வருகின்றனர்.