தமிழகச் சட்டமன்றத் தேர்தலை முன்னிட்டு தி.நகரில் உள்ள வாக்குச்சாவடியில் நடிகர் சிவகுமார் தனது வாக்கினைப் பதிவு செய்தார். அதன்பின் செய்தியாளர்களிடம் பேசிய அவர், யார் ஆட்சிக்கு வந்தாலும் டாஸ்மாக் கடைகளை உடனடியாக மூட வேண்டும் என்று ஆக்ரோஷமாக வலியுறுத்தினார். பொதுமக்களைக் குடிகாரர்களாக மாற்றுவதை நிறுத்திவிட்டு, ஏழை எளிய மக்களின் வாழ்வில் ஒளியேற்றப் பாடுபட வேண்டும் என்றும், ஆட்சியாளர்கள் தங்கள் குடும்பத்திற்காகச் சொத்து சேர்ப்பதைத் தவிர்க்க வேண்டும் என்றும் கோரிக்கை வைத்தார். மதுபானக் கடைகள் தொடங்கப்பட்ட காலத்திலிருந்தே தான் அதற்கு எதிரானவன் என்பதை அவர் மீண்டும் உறுதிபடத் தெரிவித்தார்.
பேட்டியின் போது செய்தியாளர் ஒருவர் மதுவால் பாதிப்பு உண்டா என வினவியதால் அதிருப்தியடைந்த சிவகுமார், “நீங்க குடிக்கிறீங்களா?” எனப் பதில் கேள்வி கேட்டுச் சற்று டென்ஷனானார். சுமார் 40 சதவீத மக்கள் மதுப்பழக்கத்தால் சீரழிந்து வருவதைச் சுட்டிக்காட்டிய அவர், இலவசங்கள் மக்களுக்குத் தேவை என்றும் குறிப்பிட்டார். அதேபோல் நுங்கம்பாக்கத்தில் வாக்களித்த நடிகர் சத்யராஜ், அனைவரும் கடமையாற்ற வேண்டும் என்று கேட்டுக்கொண்டார். தேர்தல் விதிமுறைகளை மதித்துத் தான் அலைபேசி கூட எடுத்துவரவில்லை எனக் கூறிய அவர், தான் யாருக்கு வாக்களிப்பேன் என்பது ஊருக்கே தெரியும் எனத் தனது பாணியில் நகைச்சுவையாகப் பதிலளித்தார்.